‘Cuentos, conseyes y marionetes’ abre’l segundu semestre de La Reciella de La Factoría

Una vegada llegada la seronda, torna n’Avilés La Reciella de La Factoría. Esta actividá entamada pola Estaya de la Llingua y ‘Reciella. Families pol Asturianu’ nel espaciu escénicu de la Factoría Cultural va abrila Elisabet Martín con ‘Cuentos, conseyes y marionetes’.

L’actriz, al traviés de marionetes artesanales y musica, va rellatar histories y cuentos destinaos principalmente pa neñes y neños de 3 a 8 años. Éstos siempre han de dir acompañaos d’una persona adulta y entrar na sala enantes del horariu del comienzu de la función, previstu pa les 19 hores, yá que les puertes van quedar piesllaes nel momentu del comienzu de la representación.

El restu d’obres programaes pa esti semestre de La Reciella de La Factoría son ‘Una casa’, d’Higiénico Papel (5 d’ochobre), y ‘Vendedora de pallabres’, de Factoría Norte (23 de payares). La entrada pa los trés espectáculos ye de baldre.