H.oquei patinos
El ḥoquei ye un deporte que consiste n’introducir una pelota dientro d’una portería mediante l’usu únicu d’un stick. Nél enfréntense dos equipos, que cuenten caún con un porteru que trata d’evitar que’l rival pueda anotar un tantu.
![By Caficha (Own work) [CC BY-SA 4.0 (http://creativecommons.org/licenses/by-sa/4.0)], via Wikimedia Commons](http://asturies.com/sites/default/files/Selección_Esp.jpg "By Caficha (Own work) [CC BY-SA 4.0 (http://creativecommons.org/licenses/by-sa/4.0)], via Wikimedia Commons")
Equipu de la Selección Española.
En ḥoquei patinos compiten dos equipos compuestos por cinco xugadores, cuatro de pista y un porteru, que se desplacen con patinos de cuatro ruedes paraleles con un frenu. La pista ta cerrada por una valla y tres les porteríes hai espaciu nel que tamién se desendolca’l xuegu. La duración de los partíos ye de 40 minutos a tiempu paráu dividíu en dos partes.
L’equipu más representativu d’Asturies ye’l Gijón Solimar tres encadenar una etapa gloriosa nesti sieglu. Asina, suma cuatro copes d’Europa (2007, 2009, 2010 y 2012), 3 copes de la Reina (2012, 2013 y 2016) y una OK Lliga (2009).
![By doe-oakridge [Public domain], via Wikimedia Commons](http://asturies.com/sites/default/files/Roller_Skate_Hockey_Oak_Ridge.jpg "By doe-oakridge [Public domain], via Wikimedia Commons")
En categoría masculina hai dellos equipos que compitieron y compiten al máximu nivel estatal. Ente ellos cabe citar al Cibeles d’Uviéu, que llegó a ganar una Copa del Rei (1980) y tien un subcampeonatu de la Recopa d’Europa (1981); el Club Patín Areces de Grau; y el Club Patín Mieres, ente otros. Dada l’afición esistente n’Asturies, llegó a convocase una seleición asturiana pa disputar un partíu amistosu internacional.
Tampoco nun podemos escaecer al restu de modalidaes que se prautiquen n’Asturies, esto ye, toes a esceición de sobre xelu. Na de sobre prau destaca sobre manera’l llabor del Real Grupo de Cultura Covadonga, con equipos masculinos y femeninos disputando competiciones de nivel estatal.
- ¿Cuántes modalidaes de ḥoquei conoces?
- Describe cómo ye un stick.
- ¿Qué títulos tán nos palmarés de los equipos asturianos?
- ¿Cuála ye la modalidá de ḥoquei que ye olímpica?