Segunda Guerra Mundial

22 Setiembre, 2016
Redacción

La Segunda Guerra Mundial foi’l mayor conflictu bélicu esistente hasta la fecha. Nél viéronse implicaos decenes d’estaos, ente ellos les más importantes potencies, que se dividieron en dos bandos. Duraría un total de seis años, ente’l 1939 y el 1945, tiempu nel que’l Mundu vivió terribles acontencimientos que nun se han de repetir.

La invasión de Polonia por parte d’Alemaña, el 1 de setiembre del 1939, consideráse la fecha d’aniciu de la Segunda Guerra Mundial. El país teutón, derrotáu na Primer Guerra Mundial y humildáu cola Paz de Versailles, pretendía formar una gran imperiu basáu na supuesta supremacía de la raza aria y, pa ello, utilizó’l so importante potencial militar.

By "Wojskowa Agencja Fotograficzna" [Public domain], via Wikimedia Commons

Varsovia (Polonia)

¿Sabíes qué…? Adolf Hitler, el líder del Tercer Reich o Tercer Imperiu –nome col s’autodenominaba’l Gobiernu alemán–, llegó al poder tres ganar nes urnes, pero pronto tomó un aire autoritariu.

La toma de Polonia por Alemaña llegaba depués de momentos de tensión ente les principales potencies que Francia y Reinu Xuníu consideraben solucionaos cola entrega a Hitler de los Sudetes (oeste de Checolosvaquia) un añu enantes. Sicasí, el pautu de non agresión ente la URSS y Alemaña y repartu d’Europa oriental, el Pautu Ribebentrop-Molotov, el 23 d’agostu del 1939, esmoleció a los aliaos y confirmóse cola invasión díes depués de Polonia poniendo como escusa un ataque polacu previu.

Tres avisar a Alemaña pa que se retirase de les tierres ocupaes, el Reinu Xuníu y Francia declaraben la guerra al país teutón, al que siguieron otros estaos del so entornu. El día 17, la URSS atacaba pol este Polonia, condenando a los polacos cola apertura de dos frentes de guerra. Una vegada tomada Varsovia, Alemaña aprovechó l’iviernu pa rearmase cola fin d’empezar un folada d’ataques que-y permitió someter gran parte del continente.

Batalla de Caen (by Sergeant Christie No 5 Army Film & Photographic Unit [Public domain], via Wikimedia Commons)

Batalla de Caen (Francia)

¿Sabíes qué…? La Segunda Guerra Mundial foi’l contestu nel que se llanzó la primer bomba nuclear de la historia. Foi obra d’Estaos Xuníos, el 6 d’agostu del 1945, en Xapón, concretamente sobre Hiroshima, a la que siguió trés díes depués otra sobre Nagasaki.

Mientres los siguiente años de conflictu Alemaña llegó a tomar París y trató de facer lo propio con Leningrad abriendo’l frente oriental que, a la llarga, provocaría la derrota d’Alemaña na guerra. Los fracasos nel Pacíficu, nel Norte d’África y na batalla de Stalingrad nel 1942 provocaron un frenu a les aspiraciones de Hitler.

Tres la cayida de la Italia fascista, nel 1943, y la toma de Francia polos aliaos, col desembarcu de Normandia de les tropes estauxunidenses nel 1944, la guerra finaría n’Europa’l 8 de mayu del 1945 cola cayida de Berlín por parte de les tropes soviétiques, lo que provocó’l suicidiu de Hitler. Les bombes atómiques sobre Xapón provocó la rendición del estáu asiáticu y l’episodiu caberu de la Segunda Guerra Mundial.