Primer Guerra Mundial

10 Payares, 2016
Redacción

La Gran Guerra, como tamién se conoz, foi un conflictu bélicu que se desendolcó n’Europa a primeros del sieglu XX, en concreto del 1914 al 1918. Diose-y el nome de Primer Guerra Mundial n’Alemaña porque s’entendía que yera un enfrentamientu ente toles grandes potencies militares de la época y los sos imperios nun mundu yá industrializáu.

Enfrentó a dos bandos: la Triple Alianza, formada por Alemaña, Austria-Hungría y Italia, y la Triple Entente, que conformaben el Reinu Xuníu, Francia y l’Imperiu Rusu. Col aniciu del conflictu, Italia acabaría dexando la Triple Alianza pa pasar más alantre a la Triple Entente, y sumaríense otros países a la Guerra, como l’Imperiu Otomanu y Bulgaria, colos primeros, y Xapón y Estaos Xuníos, colos segundos.

Lancashire_Fusiliers_trench_Beaumont_Hamel_1916 by Ernest Brooks [Public domain], via Wikimedia Commons

Trinchera

¿Sabíes qué…? L’imperialismu y la tensión militar esistente provocaron l’entamu de la guerra, anque foi un fechu puntual el que realmente desencadenó’l conflictu bélicu: l’asesinatu del archiduque Francisco Fernando, herederu del Imperiu Austro-húngaru.

El 28 de xunu del 1914 l’archiduque y la so muyer sufrieron un atentáu en Sarajevo, ciudá bosnia que naquel tiempu taba baxo dominiu austro-húngaru, d’un nacionalista serbiu. Viena echó la culpa al Reinu de Serbia de tar tres la doble muerte, dalgo que nun se pudo probar, y esixó a Belgrado que tomara midíes colos culpables, lo que nun fixo al entender que yera una intromisión d’estáu.

La siguiente aición foi la declaración de guerra por parte d’Austria-Hungría a Serbia, el 28 de xunetu, lo que provocó una serie de posicionamientos de les principales potencies qu’agrandó un conflictu que s’allargó 4 años. L’Imperiu Rusu foi’l primeru n’amosar el so apoyu a los serbios, y Alemaña declaró de siguío la guerra a Rusia y invadió Bélxica –neutral– y Luxemburgo.

By Michael Zeno Diemer (geb 1867, gest. 1939) (Bayerisches Armemuseum Ingolstadt) [Public domain], via Wikimedia Commons

Combate aéreu (cuadru de Michael Zeno Diemer)

¿Sabíes qué…? El Reinu d’España declaróse neutral nesta guerra, dalgo que foi beneficiosu nesi momentu al provocar un despegue económicu poles necesidaes alimentaries y de bienes de los países en conflictu.

La Primer Guerra Mundial foi una guerra de trincheres, esto ye, de combate cuerpu a cuerpu. El frente occidental foi’l más importante, siendo onde se xestó la derrota alemana de la guerra. Ésta tuvo llugar nel 1918, cuando fracasaron na toma de París y se rendieron ente la ofensiva francesa y estauxunidense.

Llugar onde se robló l'Armisticiu de Compiégne.

El 11 de payares roblóse l’Armisticiu de Compiègne ente los aliaos y Alemaña. Tres ellos entamáronse dellos trataos de paz ente los países de la contienda, siendo’l más importante’l de Versailles, el 28 de xuneu del 1919. Ésti foi mui duru pal país teutón, que se sintió humildáu poles condiciones puestes polos aliaos y provocó la revancha alemana na futura Segunda Guerra Mundial.