L'asturcón

7 Avientu, 2016
Redacción

L’asturcón ye una de les seis races autóctones d’Asturies. Trátase d’un caballu poni, esto ye, d’un altor menor al 1,48, que destaca pola so fuercia y que, como toos estos animeles, ta a piques del desaniciu, anque nuna dinámica de recuperación gracies al trabayu de los criadores.

Nel so orixe foi un caballu salvaxe que poblaba los montes del país. Col pasu los sieglos acabo siendo domesticáu pol home, lo que contribuyó darréu a que peligrara la so esistencia cuando, cola llegada de les máquina, el so trabayu nun fora rentable. Asina, a primeros de los 80 namái quedaben 28 exemplares, toos na sierra del Sueve.

Asturcón

¿Sabíes qué…?L’asturcón foi un animal que sorprendió a los romanos pola so bravía cuando ocuparon les tierres de los ástures y lu conocieron. Asina lo citen delles cróniques de la época.

La busca de da-y una utilidá foi la clave pa que l’asturcón siga teniendo futuru nuna sociedá como la de nueso. La so reconversión a animal de monta, destináu principalmente a neños y neñes que comiencen a facer equitación, permitió la recuperación de la población, que consiguió multiplicase hasta superar los 1.700 nel 2011.

Esti usu permitió tamién el saltu del asturcón a otros territorios más allá del asturianu. A ello ayuda a que sía un animal mui noble, con un tamañu afayadizu pa que los más pequeños puedan dominar al caballu.

By Adolfobrigido (Own work) [CC BY-SA 4.0 (http://creativecommons.org/licenses/by-sa/4.0)], via Wikimedia Commons

Fiesta del Asturcón nel Sueve

¿Sabíes qué…?Los astures consideraben al asturcón como un animal sagráu.

Pese a la situación mala que s’atopó l’asturcón nel sieglu XX, tres la promoción por parte del Estáu de caballos bretones o navarros, de más pesu y poro más rentables, siguió siendo un símbolo pa tolos asturianos. La Caxa d’Aforros d’Asturies tomólo como marca y convirtióse na raza autóctona más popular ente la población, perriba de les restantes.

Anguaño vas poder velos en centros d’equitación y inclusive en zones del Sueve, onde viven en semillibertá. ¿Prestaríate montalu y acaricialu?