La sacavera

LA SACAVERA  (FELPEYU)
(Música:Lisardo Prieto / tradicional. Lletra: Ruma Barbero)

Ruma Barbero: bodhram
Xuan Nel Expósito: curdión diatónica
Luis Senén Fernández: baxu llétricu y voz
Elías García: buzuki
Diego Pangua: flauta
Lisardo Prieto: vigulín
Moisés Suárez: guitarra

Lletra.

¿Qué cosa ye, cosadiella,
que ye prieta y amariella,
de la color de l'aviespa,
y n'otros llaos ye bermeya?
 

¿Qué cosa ye, cosadiella,
colos güeyos na testera,
tien cuatro deos nes manes,
cinco na pata trasera?
 

Saca los güeyos p'arriba,
saca la llingua p'afuera,
saca'l rabu y les patines, saca, saca...
 

¿Qué cosa ye, cosadiella,
que s'escuende  pela oriella,
nun-y tien mieu al raposu,
la fuina o la mustadiella?
 

¿Qué cosa ye, cosadiella,
que ye más bien nocherniega,
pasa l'iviernu na cama,
duerme tol día la siesta?
 

Saca los güeyos p'arriba…
 

¿Qué cosa ye, cosadiella,
qu'anda bien pela caleya,
peles peñes, pela yerba,
ente flores y ente fueya?
 

¿Qué cosa ye, cosadiella,
que s'esmuz pela llamuerga,
p'ente'l mofu y pelos sucos,
y si nun quier nun se mueya?
 

Saca los güeyos p'arriba…