Los Llendadores de la Ría d'Avilés van recoyer les cartes pa L'Anguleru

Avérase'l Nadal y L'Anguleru yá prepara'l viaxe dende'l mar de los Sargazos pa pescar angula y facer regalos a los neños y neñes del país coles perres recaudaes.

Esti sábadu los Llendadores de la Ría d'Avilés van recoyer les cartes colos sos pidimientos a partir de les 18 hores na Factoría Cultural d'Avilés, momentu nel que los presentes tamién van poder conocer a estos personaxes nuevos que van sofitar a L'Anguleru en Nuechebona. Los llendadores son homes, muyeres, neños y neñes encargaos de la proteición de los nuesos calces mientre tol añu, faciendo llabores de cuidáu, llimpieza y repoblación de les especies que viven nos ríos asturiano. Un trabayu nel que tamién pues collaborar tu.

Si t'esfuercies podrás llegar a ser Maestru Llendador, títulu que da'l privilexu de collaborar con L'Anguleru en Nuechebona. Estos pasos diéronlo Xesús 'El Ruleru' y la so fía, Lolina 'La Rulera', que recoyó'l testigu del so padre y que va tar mañana na recoyida de cartes xunto con Víctor Raúl Pintado Rey 'Vitu', impulsor d'esti cuentu de Navidá, y de David González Nuño, direutor del Colexu Públicu Marcelo Gago, y de la maestra de Llingua Asturiana, Xulia Alonso.

Nel actu, que tien entrada llibre, tamién se va dar a conocer a los presentes la tradición del nataliegu, tueru que se quema nes cases asturianes en Nadal, y va presentase la torna al inglés del cuentu de L'Anguleru, cola participación de la so traductora Isabel Val y Fernando González, de l'Asociación Cultural Garabuxada, coleutivu creador del personaxe. Tamién va celebrase un cuentacuentos intrepretaos por Vitu y Val.