Siderurxa

7 Ochobre, 2015
Asturies.com

Denomínase siderurxa a l’actividá de sacar fierro pa trabayalo y tresformalo. El fierro trátase d’un mineral duro, de color gris y mui dúctil cuando ta ingriento, esto ye, cuando ta a mui elevada temperatura. El so tratamientu dase en plantes siderúrxiques, onde se procesa pa convertilo n’arrabio y, darréu, n’aceru, una aleación de fierro y de pequeñes cantidaes de carbonu.

Al aceru que se produz dase-y la forma necesaria pa destinase a la industria tresformadora a la que se quier dedicar esa producción. Trátase d’un productu clave nel mundu actual, yá que tien un baxu coste, resistencia, llarga vida útil y variedá de calidaes. El sector automovilísticu, el de la construcción, el de la fabricación d’electrodomésticos y el d’envases son los principales demandadores d’aceru.

«Siderurgiamuseo» de Yandrak & Monsacro - Trabajo propio. Disponible bajo la licencia Copyrighted free use vía Wikimedia Commons - https://commons.wikimedia.org/wiki/File:Siderurgiamuseo.jpg#/media/File:Siderurgiamuseo.jpg

Sede principal del Muséu de la Siderurxa d'Asturies

¿Sabíes qué…? La siderurxa ye’l principal motor económicu d’Asturies.

La sociedá castreña yá trabayaba col fierro, col que los ástures facíen principalmente aperos de llabranza y armes. Col pasu los sieglos, como ye lóxicu, estes llabores foron evolucionando hasta convertise nun ámbitu de progresu cola proliferación de ferreríes. Sicasí, el saltu cualitativu llegaría cola siderurxa industrial a mediaos del sieglu XIX, convirtiendo al nuesu país punteru nel sector xunto con Euskadi.

Les primeres grandes factorías siderúxiques asturianes asitiáronse en Mieres y Llangréu, a la que depués siguiría la de Moreda, en Xixón, siempre de la mano del sector priváu. Tamién hai que destacar la Fábrica de Trubia. Nun sería hasta’l 1950 cuando se funda Ensidesa, compañía estatal que naz pa cubrir el déficit de producción d’aceru que tenía d’aquella l’Estáu español.

«Poblau ensidesa» por Mikel González - Copyright 2006 by Mikel González.. Disponible baxo llicencia CC BY-SA 2.5 es vía Wikimedia Commons - https://commons.wikimedia.org/wiki/File:Poblau_ensidesa.jpg#/media/File:Poblau_ensidesa.jpg

Cases del pobláu de trabayaores en Tresona

¿Sabíes qué…? La primer factoría d’Ensidesa asitióse n’Avilés, entovía activa.

Nel 1973 Ensidesa daría un gran pasu nel so desarrollu al integrar Uninsa, empresa qu’axuntaba dafechu l’actividá de les trés siderúrxiques históriques asturianes y que nun pasaba per un bon momentu: Fábrica de Mieres, Duro Felguera (Llangréu) y Santa Bárbara (Moreda). Nesi sen, hai que destacar qu’Uninsa llevantara años enantes una gran factoría en terrenos de Veriña, Puau y Fresno, nel conceyu de Xixón. Ensidesa sería de capital públicu hasta los años 90, cuando comenzó la so privatización. En primer llugar crearíase CSI tres la xunión de los Altos Hornos de Bizkaia y los Altos Hornos del Mediterráneo. Depués de la so privatización pasaría a llamase Aceralia, llueu mercada pol magnate del aceru angloindiu Lakshmi Mittal, denominándose Arcelor-Mittal.

La siderurxa dio emplegu a miles de persones n’Asturies y provocó importante foles emigratories a Avilés y Xixón, tanto de xente d’otres zones del país como d’otros puntos del Estáu, provocando un importante aumentu nes sos poblaciones. Nel 1975 Ensidesa contaba con 27.000 emplegaos. Güei Arcelor-Mittal tien en plantiya cerca de 5.000, anque continúa siendo’l motor d’Asturies.