L'oru n'Asturies

13 Agostu, 2015
Asturies.com

El material esistente de mayor valor ye l’oru. Dende tiempu atrás emplegóse como pieza d’intercambiu comercial y p’acuñamientu de monedes, por mor de les sos cualidaes, sobre manera pola so resistencia a la corrosión, amás de pola so belleza. Ta consideráu símbolu de pureza, valor y realeza, d’ehí la fixación que tuvo l’home dende siempre por esti metal de los nomaos nobles.

Dende la Edá del Cobre conozse’l trabayu col oru. Toles civilizaciones estraxeron esti material de les mines y fixeron oxetos de valor con él. Güei la producción mundial d’oru ye mui importante, utilizándose un 50 por ciertu en xoyería, un 40 en reserves e inversiones y un 10 n’usos comerciales.

"Toi 250kg gold bar" by PHGCOM - Own work by uploader, Toi Mine. Licensed under CC BY-SA 3.0 via Commons - https://commons.wikimedia.org/wiki/File:Toi_250kg_gold_bar.jpg#/media/File:Toi_250kg_gold_bar.jpg

La barra d'oru mas grande del mundu

¿Sabíes qué…? Tolos países cuenten con reserves d’oru nos sos bancos centrales que sirven como garantíes de pagu y favorecen la estabilidá na economía nacional.

Asturies ye un de los territorios onde hebo y hai mines d’oru. La presencia d’esti material na nuesa tierra foi trabayada mientre el periodu castreñu polos ástures y convirtióse nún de los principales motivos polos que l’Imperiu Romanu punxo tanto enfotu na conquista d’Asturies. Asina, tres consiguir vencer nes guerres astur-cántabres y asentase, los romanos construyeron delles mines pa estrayer l’oru.

Tamién se prauticaba’l batéu, consistente en llavar l’arena del ríu separando materiales pa quedase colo más pesaos, esto ye l’oru. D’esta forma aprovéchense los arrastres que faen les agües de las piedres de cuarzu qu’en medio de les tormentes fráyense lliberando l’oru que lleva dientro. Llueu ésti queda depositáu nel calce de los ríos, onde los batiadores trabayen d’una manera totalmente artesanal. Güei tovía se prautica nes zones auríferes, llegando a celebrase un tornéu de batéu de calter internacional na población de Navelgas a finales de xunetu y primeros d’agostu.

"Gold 30g for a 860kg rock" by PHGCOM - Own work by uploader, Toi gold mine. Licensed under CC BY-SA 3.0 via Commons - https://commons.wikimedia.org/wiki/File:Gold_30g_for_a_860kg_rock.jpg#/media/File:Gold_30g_for_a_860kg_rock.jpg

Mineral d'oru

¿Sabíes qué…? Espertos consideren qu’ehí podría haber les mayores reserves d’Europa. L’occidente del país ye onde s’asienten.

Cola conquista d’América por parte de la Corona de Castilla y Aragón, la esplotación del oru esistente n’Asturies baxó, recuperándose nos tiempos modernos. Asina, a finales del sieglu XIX y XX comenzaron a trabayase les mines d’oru n’Asturies, con sociedaes de capital estranxeru. Anguaño tovía hai compañíes de fuera que trabayen y pretenden trabayar na estraición del materia abriendo esplotaciones nueves. De xuru que recuerdes la polémica qu’hebo en Tapia cola mina de Salave, que gran parte de la población refuga pol peligru medioambiental que conlleva. La empresa Astur Gold, de capital canadiense, continúa trabayando nos tribunales pa sacala alantre.

Si quies conocer meyor la historia del oru n’Asturies pues visitar el Muséu del Oru, asitiáu na población tinetense de Navelgas. Ta dedicáu al material, al so valor y al de la historia de los homes que dende hai sieglos trabayaron pa poder estrayer esti metal. Tamién podrás prauticar el batéu y, quién sabe, ¡atopar oru!