L'aviación

30 Xunetu, 2015
Asturies.com

Dende l’aniciu de la humanidá, ún de los suaños del home yera poder volar como los páxaros. Tuvieron que pasar munchos años pa poder facelo realidá, pero en poco más de 100 años dende que se consiguió l’oxetivu, l’aviación avanzó de manera espectacular, convirtiéndose nún de los métodos de tresporte mayoritarios y acortiando distancies ente los distintos países del planeta.

L’home intentó en munches ocasiones ellevase nel aire, pero nun lo algamaría hasta’l sieglu XVIII colos globos aerostáticos, anque col hándicap de que nun se podíen controlar. Esta barrera superóse nel sieglu XIX colos dirixibles, momentu nel que los científicos de la época empezaron a esperimentar colos aeroplanos.

Primer vuelu de los hermanos Wright

¿Sabíes qué…? El primer vuelu n’avión controláu fíxose nel 1903 en Kitty Hawk (North Carolina). Los sos responsables foron los estauxunidenses hermanos Wright y duró 12 segundos, nos que se desplazó l’aeronplanu 37 metros a una velocidá de 48 quilómetros per hora.

Fabricantes de bicicletes, Wilbur y Orville Wright diseñaron el ‘Flyer’, aeronave más pesada que l’aire col que fixeron el so primer vuelu un 17 d’avientu. Orville foi’l primer pilotu, echáu sobre l’ala inferior del avión, mentes que’l motor asitiábase a la so derecha y facía xirar dos hélices. Con dos cuerdes ataes a la punta de les ales, el pilotu podía dirixir l’aeroplanu.

El primer avión en nun necesitar raíles, catapultes o aire p’alzar el vuelu, sinón que podía facelo polos propios medios, inventólu’l brasileñu Alberto Santos nel 1906, que fixo la primer exhibición en París. Nos años siguientes, munches persones investigaron nesti campu, avanzando na autonomía y capacidaes d’estos aparatos.

Bombarderu B-17 "Fortaleza volante" en 1942

¿Sabíes qué…? Los aviones foron mui importantes na Primer Guerra Mundial (1914-1917) pa misiones de reconocimientu principalmente, anque’l so papel foi clave na Segunda Guerra Mundial (1939-1945).

La importancia de los aviones nel mayor conflictu bélicu de la historia de la humanidá vino gracies al gran desarrollu qu’éstos vivieron nel periodu d’entreguerres. Ye nesti tiempu nel que, amás de los avances na aviación militar, se ponen les bases de l’aviación comercial, naciendo les primeres llinies aérees, anque ésta nun se desarrollaría tal y cómo la conocemos agora hasta depués de la Segunda Guerra Mundial.

Los viaxes n’avión foron, mientres munchos años, un auténticu artículu de luxu, yá que los precios de los billetes yeren mui altos pa un gran sector de la población. Cola entrada del sieglu XXI y la proliferación de les aerollinies de baxu costu, baxaron enforma los precios de los billetes, democratizando los desplazamientos nesti mediu de tresporte, ún de los más utilizaos anguaño.