Los bolos

N’Asturies prautíquense diferentes tipos de bolos: cuatriada, bolu palma, batiente, bolu celta, bolu vaqueiru, dexabolu, pasadiez de Somiedu, cuatrín d’Agones… En total hai 43 modalidaes, según recueye Carlos Suari, ún de los mayores espertos en bolos, nel so ‘Atles de los bolos asturianos’.

 

La bolera de cuatriada tien 25 metros de llargo y 5 d’anchu, y divídese en trés zones: tiru, zona intermedia y castru, onde s’asitien los diez bolos y el biche –un bolu de tamañu menor–. L’oxetivu del xuegu consiste en derribar el mayor númberu de bolos posibles y que la bola, pol efeutu, termine na zona de cuatriada, marcada pol biche, o derribe ésti. Cuando’l biche ta a la izquierda, dizse que se tira ‘pa la mano’, mentes que si ta pa la derecha, denomínase ‘pal pulgar’.

La Federación Asturiana de Bolos entama munches competiciones de cuatriada, tanto nel formatu individual como por peñes, nes munches boleres esistentes n’Asturies. Cada vegada más hai más xugadores mozos, con torneos especiales pa ellos. ¡Cómo nun t’animes a xugar!

 

Les otres modalidaes federaes de bolos son batiente, celta, lleonés, palma, rodao y vaqueiro. A ellos hai que sumar el bowling, d’orixe estauxunidense, que se prautica namái na bolera esistente nel centru comercial Parque Principado (Siero).

Si quies conocer más sobre esti deporte tan prestosu pues consultar el ‘Atles de los bolos asturianos’ de Suari, onde tán bien esplicaos les 43 modalidaes que se prautiquen n’Asturies. Tamién ye mui afayadizu ‘El pallabreru de los bolos’ qu’editó la Oficina de Normalización Llingüística de Xixón.