Naciones celtes

14 Abril, 2015
Asturies.com

Denomínense naciones celtes a aquellos países que caltienen una llingua d’orixe celta. En total son seis: Breizh (Bretaña Francesa), Kernow (Cornualles), Cymru (Gales), Alba (Escocia), Éire (Irlanda) y Mannin (Isla de Man). Toes elles conformen parte de la Lliga Celta, organización de calter cultural y políticu.

Pese a que nun cumplen los requisitos de la Lliga Celta, basaos nel tema llingüísticu, tamién se consideren naciones celtes a Galicia y Asturies. Éstos reciben el nome de celtes del sur por mor de tener una cultura de fondos raigaños celtes pese a que la llingua propia del llugar ye d’orixe llatinu.

Bandera de Breizh

¿Sabíes qué…? L’asturianu tien dellos celtismos, como cerveza, carru, camisa o sayu. Tamién hai restos na toponimia, como’l casu Taranes o Llugones.

Como celta conozse la cultura de dellos pueblos que poblaron Europa mientres la Edá de Fierro. Les teoríes dicen que tuvieron el so orixe nes estepes de la zona del mar Negru y del Caspio, pa después estendese hacia l’occidente. Na Península Ibérica estableciéronse na zona norte, sobre manera en Galicia, Asturies y Portugal, dexando un posu fondu na cultura del llugar.

Otra manera, la emigración permitió llevar la cultura celta a otros territorios lloñe d’Europa, como l’Acadie (provincies marítimes nel este de Canadá), Arxentina, Australia, Cuba o México.

Carpa d'Asturies nel festival de Lorient

¿Sabíes qué…? El certame del mundu celta más importante ye’l Festival Interceltique de Lorient, en Breizh, onde Asturies xuega un papel perimportante.

Nel Intercelticu d’An Oriant/Lorient participen toles naciones celtes más dalguna otra convidada. Trátase d’un festival que sirve de puntu d’alcuentru a la cultura celta nel que la música xuega un papel fundamental.

N’Asturies tamién s’entamen festivales d’esti tipu, a menor escala, nel que participen formaciones d’otres naciones celtes, principalmente gallegues, bretones, irlandeses y escoceses. Asina, tenemos l’Intercélticu d’Avilés, l’Intercéltico de Tapia o dellos festivales de gaites, como’l de Candás. Xixón tamién entama’l Festival Arcu Atlánticu, anque ésti nun lleva la etiqueta celta en busca d’ampliar les sos mires a tola cultura denominada atlántica.