Reciella entama ‘La Escolina’, una actividá d’aprendizaxe d’asturianu pa neños
Los neños y neñes asturianos de 1,5 a 9 años van poder aprender y prauticar asturianu fuera del entornu escolar, onde la so ausencia nos primeros años ye un fechu, gracies a una iniciativa de l'asociación.
Trátase de ‘La Escolina’ y, nun primer momentu, va tener sedes en Xixón, Uviéu y Carreño.
Mientres una hora a la selmana, peles tarde n’horariu por consensuar polos padres, los escolinos y escolines, al traviés del xuegu y l’aprendizaxe manipulativu y por descubrimientu, van prauticar asturianu nun entornu de socializacióncon reciella de la so edá y en grupinos pequeños, siempre acompañaos por profesoráu especializao. La Escolina dividiráse en cuatro clases por edá: de 1,5 a 2 años; de 3 a 4; de 5 a 6: y de 7 a 9.
El preciu de la matrícula ye de 20 euros mensuales y, de momento, La Escolina va tener actividá en Xixón, Uviéu y Carreño, cola posibilidá de llegar a más conceyos nel casu de qu’haya demanda. Los padres interesaos han de formalizar la inscripción pal cursu 2015-2016 al traviés del corréu info@reciella.com o per un priváu na páxina de Reciella en Facebook. Los datos necesarios son fecha de nacimientu, conceyu y preferencies o restricciones de día y horariu.
