Día de les Lletres Asturianes
El Día de les Lletres Asturianes ye la xornada cola que los asturianos homenaxamos a la nuesa lliteratura. Vien celebrándose dende l’añu 1980 y enmárcase na Selmana de les Lletres Asturianes.
![Cartel del XXXVI Día de les Lletres Asturianes Cartel del XXXVI Día de les Lletres Asturianes](http://asturies.com/sites/default/files/dia_lletres_01.jpg)
Mientres la Selmana de les Lletres Asturianes celébrense munches actividaes en tolos puntos d’Asturies. Tolos años ta dedicada a dalgún autor o dalgún xéneru, que de xuru trabayastes en clase de Llingua Asturiana xunto col to maestru.
Esta xornada tamién sirve de reivindicación. Dende la so fundación, nel añu 1984, la Xunta pola Defensa de la Llingua Asturiana vien celebrando nel Día de les Lletres una manifestación pa reivindicar la oficialidá de l’asturianu, lo qu’igualaría los nuesos derechos a los de falantes de castellanu n’Asturies.
![Cartel del XXX Día de les Lletres Asturianes Cartel del XXX Día de les Lletres Asturianes](http://asturies.com/sites/default/files/dia_lletres_02.jpg)
El Día del Llibru Asturianu ye otra celebración paralela al Día de les Lletres Asturianes. Esta xornada ye posible mercar llibros y discos n’asturianu con un 10 por cientu de descuentu sobre’l so preciu normal. D’esta forma se pretende potenciar la llectura y la escucha de llibros y discos, de manera respeutiva, nel nuesu idioma. D’igual forma, regálase’l llibru conmemorativu de la Selmana de les Lletres Asturianes con cada merca.
Dende la creación de la RTPA, l’ente públicu de comunicación entama una programación especial n’asturianu que va medrando añu tres añu. La mayor parte de la mesma faise na RPA, esto ya, la radio.
- ¿Quién ye la presidenta de l’Academia de la Llingua Asturiana?
- ¿A qué tuvo dedicada la Selmana de les Lletres Asturianes última?
- ¿Por qué l’asturianu nun ye una llingua oficial?
- ¿Sabríes dicir un espaciu/película/programa que se fixera en llingua asturiana na RTPA?