Escolinos de Xixón homenaxen a Pachín de Melás nel centenariu del parque d’El Cerilleru

Alredor de 250 escolinos y escolines de Llingua Asturiana de siete centros escolares del oeste de Xixón participaron esti miércoles nun actu nel parque d’El Cerilleru qu’abrió les XX Xornaes de Lllingua y Cultura Asturiana. Ésti tenía como fin servir d’homenaxe a Emilio Robles Muñiz 'Pachín de Melás' con motivu del centenariu de la inauguración de la zona infantil, na que tomó parte con unos versos, y a los neños y neñes de La Calzada.

El 29 de xunu del 1915 foi la fecha na que s’abrió al públicu’l parque de La Calzada, como se nomó naquella época, el primeru infantil d’Asturies, lo que tuvo repercusión a nivel estatal, como amuesa una noticia del ABC al día siguiente que situaba la zona de xuegos n’Uviéu por equivocación. Un cartafueyu editáu pola Oficina de Normalización Llingüística pa repartir ente escolinos y vecinos esplica bien la historia d’esti parque con semeyes y dalgunos datos destacaos nestos cien años de vida, a lo qu’hai que sumar el poema completu que Pachín de Melás recitó na so inauguración. Precisamente, el Conceyu de Xixón quixo aprovechar esti actu pa destapar una placa homenaxe al escritor xixonés –asitiáu nel estremu occidental del parque– con dalgunos versos d’esi poema (‘¿Qué seriones, qué fomales / tan los neños de La Calzada…!’ / ¡Cómo ascuchen los probinos / a la xente qu’aquí fala! / ¡Ay! Que guapos rapacinos / que nun gorguten migaya…), asina como a los rapacinos d’esti popular barriu xixonés.

Carlos Alba ‘Cellero’ encargóse de presentar y animar l’actu pa conmemorar que “va cien años de la inauguración del primer parque de xuegos pa neños d’Asturies” y dio pasu a los cuatro escolinos que s’encargaron de lleer el poema íntegru énte la mirada atenta de los sos compañeros y de munchos vecinos que s’averaron al llugar. Darréu xubió a dicir unes pallabres Carlos Rubiera, conceyal d’Educación, Cultura, Mocedá y Festexos, nes que recordó a Pachín de Melás, “un amante del nuesu país y del nuesu idioma que de tar equí echaría llárimes d’emoción, yá qu’él nun pudo estudiar asturianu na escuela como vosotros”. Por ello, tresmitió a los rapacinos que valoren y aprovechen “la oportunidá que tenéis” al tiempu que-yos felicitó por estudiar Llingua Asturiana “de manera voluntaria”. “Pasaren cien años y les pallabres del nuesu idioma reverdecen cada primavera”, finó’l conceyal. Pa zarrar l’actu, los 250 alumnos y alumnes pudieron disfrutar con ‘El cantar del vasu’. Hai que destacar que nesta celebración l’Academia de la Llingua Asturiana tuvo representada por Vicente García Oliva.

Actividaes pa neños y vecinos

La conmemoración del centenariu del parque d’El Cerillero sirvió p’abrir les XX Xornaes de Llingua y Cultura Asturiana que celebra l’Atenéu de La Calzada y diez centros escolares de la zona oeste del conceyu: Atalía, Eduardo Martínez Torner, El Lloréu, Federico García Lorca, Miguel de Cervantes, Montiana, Príncipe de Asturias, Santa Olaya, Tremañes y Xove. La primer actividá va tener llugar el llunes, a les 19.30 hores, cola participación de l’Asociación de Intérpretes de la Canción Asturiana (AICA) dientro del ciclu ‘L’asturianada nos centros municipales’, pa continuar el día siguiente cola presentación a la mesma hora del llibru ‘Cápsules de tiempu’, de Carlos González Espina, obra cola que ganó’l VII Premiu María Xosefa Canellada de lliteratura infantil y xuvenil.

El miércoles, a les 18 hores, Cellero va representar ‘Xuan Soldáu’, mentes que’l xueves 14, a les 19 hores, va tener llugar una actuación del grupu Mestura colos sos ‘Poemes de carambelu’. Marisa López Diz y Luis Manuel Suárez van repetir el miércoles 20 de mayu, a les 19.30 hores, con cantares en gallego-asturiano tres la proyeición del curtiumetraxe ‘A fiya del xastre’, realizáu pola cantante del dúu. Xunto a estes actividaes abiertes a tol públicu, los escolinos van poder disfrutar de talleres d’alfarería, d’introducción al monte, d’iniciación al cómic o a los bolos, amás de corales infantiles y actuaciones teatrales. Los rapacinos y rapacines de terceru d’Infantil, mentes, van participar nun taller de xuegos tradicionales asturianos.

Na semeya, Rubiera interviene nel actu xunto colos rapacinos que lleeron el poema de Pachín de Melás. Na parte inferior pue vese la placa d'homenaxe del Conceyu de Xixón al escritor xixonés y a los neños y neñes de La Calzada.