Rosetta: un pasu más nel estudiu del Universu
![](https://asturies.com/sites/default/files/Philae%20de%20la%20Misi%C3%B3n%20Rosetta%20nel%20cometa.jpg)
La Misión Rosetta, entamada pola Axencia Espacial Europea (ESA), supón un pasu perimportante de la humanidá nel estudiu del Universu. Nel pasáu mes de payares, una sonda de nome Philae aterrizó sobre un cometa y ta unviando datos claves pa conocer un poco más sobre l’orixe del Sistema Solar y de les condiciones iniciales necesaries pa l'apaición de vida.
Como bien sabes, l’espaciu ye inmensu y les distancies ente los distintos planetes ye enorme. Por esti motivu, la nave que protagoniza la Misión Rosetta, de la que de xuru oyisti falar nos meses últimos, fixo la so salida nel añu 2004. En concretu llanzóse’l cohete de mesmu nome’l día de 2 marzu mui lloñe d’Europa, na Guayana francesa, departamentu francés nel continente americanu. Diez años depués cumplió’l so oxetivu: aportar a la órbita del cometa 67P/Churiumov-Guerasimenko –nun primer momentu pensóse n’otru astru–, cercanu al Sol, pa entamar entós el descensu de la sonda Philae p’aterrizar sobre’l mesmu de manera suave. La operación yera enforma complicada y, pese a qu’había optimismu en que pudiera facese, tamién había dosis d’incertidume en que dalgo pudiera salir mal. Ten en cuenta el tiempu que tardó la nave non tripulada Rosetta en llegar al cometa y les condiciones complicaes nes que s’alcontraba.
Finalmente, el 12 de payares consiguióse esti ésitu na historia de la investigación especial. Philae posábase en 67P/Churiumov-Guerasimenko, anque non ensin dificultá, yá que’l suxetamientu nun foi l’afayadizu. Sicasí, l’oxetivu taba cumplíu y la sonda principiaba’l so llabor d’unviar datos que van servir a los científicos de tol mundu pa poder estudiar el Sistema Solar y l’orixe del agua, que pudo llegar a la Tierra al traviés de los cometes. Al mesmu tiempu, Rosetta va caltenese na órbita de 67P/Churiumov-Guerasimenko, cartografiando l’astru y unviando tamién información perimportante.
Ye de destacar qu’esta misión pudo salir alantre gracies a la cooperación internacional, esto ye, el trabayu n’andecha ente dellos estaos y países, y que la iniciativa salió d’Europa. Tamién ye importante recordar que ye la primer vegada que l’home consigue introducir una nave na órbita d’un cohete y que s’aterriza nél de forma suave. Agora, tres conocer un poco meyor lo que supón la ‘Misión Rosetta’, has de tar sollerte nos descubrimientos que, poco a poco, van dir faciendo públicos los investigadores que trabayen colos datos que nos lleguen dende lloñe. Mui lloñe y mui cerca del Sol.
Na semeya, Philae nel cometa 67P/Churiumov-Guerasimenko. Imaxe propiedá de ESA/Rosetta/Philae/CIVA.
Si te presta l'estudiu del espaciu, equí ufrímoste una páxina web y un videu n'inglés pa qu'amplíes los tos conocimientos sobre la misión.