El Reinu d’Asturies

5 Abril, 2014
Asturies.com

El Reinu d’Asturies ye la forma d’organización política ya institucional que tuvo Asturies ente los años 718 y 925. Nel añu 711 los musulmanes del norte d’África cruciaron l’estrechu de Xiblaltar y fueron ocupando tola Península Ibérica, acabando col reinu de los visigodos. En menos d’una década los musulmanes yá habíen derrotao a los cristianos y conquistao tola Península, llegando incluso a ocupar el sur de Francia tamién.

Sicasí, yá nel 718 diba comenzar la resistencia a esa ocupación, y diba entamar precisamente n’Asturies, onde habitaben los ástures, los nuesos antepasaos. Los ástures de la zona del oriente d’Asturies escoyeron como xefe a Pelayu, que derrota nel 718 a los musulmanes na famosa batalla de Cuadonga, lliberando la zona del poder musulmán y entamando un reinu, del qu’él va ser el primer monarca y que va tener la so capital en Cangues d’Onis.

Asturies nel añu 814

A la so muerte diba sucelu Favila, y tras él Alfonsu I, que diba iniciar la espansión de les fronteres del reinu asturianu. Con él el Reinu sobrepasa les fronteres de l’actual Asturies, conquistando Cantabria, el País Vascu, parte de Galicia y tamién del norte de Lleón y Castiella. Después vendríen Fruela I, Aureliu y Silu. Esti últimu treslladaría la capital de Cangues d’Onís a Pravia. Mientres, el reinu diba ampliando fronteres hacia’l sur y refugando los ataques musulmanes y tamién les incursiones vikingues na costa asturiana. Tras la muerte de Silu gobernarán Mauregatu, Bermudu y darréu d’ellos reinará Alfonsu II, que cambia la capital de Pravia a Uviéu nel 791, y que dende entós ye la capital d’Asturies. Continúa la llamada “reconquista” de les tierres ocupaes polos musulmanes. Ramiru y Ordoñu son los siguiente reis. A la muerte d’esti últimu-y sucede Alfonsu III, que reinará ente’l 852 y el 910 y con él llega’l momentu del máximu poder d’Asturies. Les fronteres del reinu llegaron hasta’l Dueru.

Cruz de la victoria, simbolu del Reinu d’Asturies

¿Sabíes que…? Existe una perconocida historia que diz que’l segundu rei astur, llamáu Favila, que yera fiu de Pelayu, morrió pol ataque d’un osu demientres una cacería, polo que namás puede reinar dos años (del 737 al 739).

A la so muerte dividó’l reinu en trés partes, pa caún de los sos fios. García fue rei de Lleón, Ordoñu II rei de Galicia y Fruela II rei d’Asturies. Pero cola muerte de los dos primeros, nel 925 Fruela II convertíase en rei de Lleón, y yá cola capital del reinu na ciudá del mesmu nome, el reinu d’Asturies desapaez y a partir d’esi momentu ye’l reinu de Lleón. Ye’l fin d’una Asturies independiente depués de dos sieglos.