AsturtOOns espubliza dos llibros nuevos ilustráos por Enrique Carballeira
La editorial AsturtOOns edita dos histories nueves n’asturianu acompañaes polos dibuxos d'Enrique Carballeira. Éstes son ‘Mio ma ye un dragón coloráu’ y ‘El día de los charcos’.
El primer llibru tien testu de Xavier Frías Conde, un amante de les llingües y la lliteratura y profesor de gallegu y portugués na UNED, que yá tien espublizaos dellos llibros de lliteratura infantil y xuvenil, amás de poemes en dellos idiomes. Esta obra ye una historia d'intriga y humor con 32 páxines a too color, que respuende a la entruga '¿qué pasaría si descubrieses un díi que la to madre ye un dragón coloráu?
Pela so parte, ‘El día de los charcos’ ye una historia d'Enrique Carballeira, ilustrada pol mesmu autor. Nél, los neños del mundu deciden que yá ta bien, que llegó la hora de plantar cara y qu’un pocu d’agua nos pantalones o nes playeres nun tien nada de malo; asina naz el ‘Día Mundial de los Charcos’.