Los escolinos de colexos de tol país yá pueden participar nos Sidrocoles
Per sestu añu, La Sidra pon en marcha los Sidrocoles, actividá enfocada a neños y neñes de Primaria col oxetivu de que conozan la cultura de la sidra y el so procesu d’ellaboración. Colexos de tol país pueden participar nesta prestosa iniciativa.
Pese a que’l Sidrocole tien actividá a lo llargo de tol cursu, esti tiempu ye’l meyor pa principiar colos munchos talleres qu’ufre, yá que tamos en periodu de pañar y mayar la mazana cola que llueu s’ellaborará la sidra. Asina, nel taller de pañar, los neños y neñes desplazaránse a una pumarada onde escoyeran el frutu afayadizu pa facer sidra. Amás, conocerán toles carauterístiques de les mazanes y detalles sobre les munches variedaes propies qu’hai n’Asturies. Díes depúes, cola materia prima bien llimpia, los responsables d’esta actividá van treslladar un llagar portátil al colexu xunto cola mayadora de rabil, los mayos, el duernu y la prensa, cola fin de facer sidra del duenu. Asina, va dividise la clase en dos grupos pa que mayen mazana de la manera tradicional y cola mayadora de rabil, pa depués prensar la magaya mientres reciben esplicaciones sobre cómo esa sidra dulce pase a ser sidra natural tres un procesu de fermentación. Otra de les posibilidaes ye visitar un llagar nestos díes pa que vean in situ cómo se trabaya nun llagar en tiempu de mayanza, siempre acompañaos colos comentarios y esplicaciones del llagareru.
Tamién ye posible plantar un pebidal de pumares de sidra tres escoyer les granes ente la magaya, como se fai de manera tradicional. Darréu, treslladaráse a un sementeru que pasará a formar parte del Plan de Recuperación Pomolóxica de La Sidra. La intención ye que, al añu siguiente, dalgunos de los árboles del pebidal tornen al centru escolar pa que se planten nes sos instalaciones o nun puntu cercanu. Yá en primavera, la revista especializada na nuesa bébora tradicional entama una actividá de conteníu artísticu consistente nuna visita a una pumarada en flor, onde, colos materiales afayadizos, convidaráse-yos a debuxar la guapura de la flor del pumar. Tamién tendrá la so parte científica, con esplicaciones sobre los concepto botánicos básicos. L’actividá va finar cola visualización d’obres de pintores asturianos inspiraes en pumaraes.
Taller d’escanciáu
Ente los tallares que se pueden facer en cualquier fecha del añu ta la del escanciáu. Nél, los rapacinos y rapacines aprenden a echar sidra tres recibir nociones básiques: postura, cómo garrar un vasu y la botella y tamaño del culín, ente otros. Pa ello, van prauticar con botelles y vasos enllenos d’agua y protexíos con chubasqueros enantes d’echar ún culín d’agua con una botella de verdá. En dalgunos centros entámense concursos d’echadores pa facer entá más divertida esta actividá.
Los colexos interesaos en participar en dalguna d’estes actividaes o n’algamar información, pueden ponese en contautu cola revista La Sidra al traviés del teléfonu 626.782.830.