Abiertu'l plazu de matrícula pa la Universidá Asturiana de Branu

L'Academia de la Llingua Asturiana ta acabante abrir el plazu de matrícula pa los cursos de la Universidá Asturiana de Branu, que va tener llugar en Cangas del Narcea del 30 de xunetu al 10 d'agostu.

Los cursos, que tán dirixíos polos académicos Xosé Antón González Riaño y Pablo Xuan Manzano, van celebrase na villa canguesa en réximen d'internáu, teniendo como sede académica'l IES de Cangas del Narcea y como llugar d'agospiu la Escuela-Hogar de Cangas.
La formación qu'ufierta la Universidá Asturiana de Branu tien reconocencia oficial per parte de la Conseyería d'Educación del Principáu d'Asturies, darréu de l'acreitación de l'ALLA como "Entidá Organizadora d'Actividaes de Formación Permanente del Profesoráu". Ello afita a tolos efeutos la reconocencia d'estos Programes Formativos dende'l puntu de vista alministrativu (curriculum, méritos, sexenios, etc.) pal profesoráu d'Educación Primaria y Secundaria del Principáu d'Asturies.
Los cursos ufiertaos van dende'l Cursu elemental de Llingua Asturiana a los centraos nel Afondamientu Cultural y Llingüísticu, pasando per aquellos que s'imparten en collaboración cola Universidá d'Uviéu.
 
Pa más información puen consultase los programes espublizaos na páxina web de l'ALLA.