"Nardo y Quina" tán d'aniversariu

La tira d'humor gráficu "Les coses de Nardo y Quina" que creara l'autor piloñés Enrique Carballeira, ta acabante de cumplir venti años. Pa celebralo la editorial Asturtoons editará un llibru coles meyores histories.

"Nardo y Quina", una pareya de gochos nada corrientes, son los protagonistes d'esta historia que, por embargu, arródiase d'un garrapiellu más de personaxes, tanto persones como otros animales. Ente estos últimos apaecía hai poco la figura d'Urelio, un gochu asturcelta que llegaba pa cubrir el furacu que dexaríen na casería los protagonistes si, finalmente, marchaben de viaxe a Marte.
Pal autor, Enrique Carballeira "nun ye fácil llegar a los 20 años cuando tas fechu de papel y tinta" pero "si lo pensamos fondamente, quiciabes nos atopemos con qu'estos personaxes tán fechos de daqué más. Posiblemente tán formaos por milenta pedacinos, migayines de los llectores y siguidores de la tira, selmana a selmana". Esta tira espublízase selmanalmente nes publicaciones El Fielato, El Narcea y El Nora.
La esbilla de toles tires epublizaes va llegar de la mano de la Editorial Asturtoons sol títulu "La Tenada Fantasma", de la que yá tenemos un anticipu en Youtube.