Yá ta na cai'l discu "Xentiquina Crew"

El discu recopilatoriu nel que dalgunos de los meyores grupos asturianos versionen cantares del grupu de neños y neñes "Xentiquina" yá ta na cai. Nél vamos poder topar, amás del CD de música, el DVD documental "Seliquín-Xentiquina, una ferramienta pedagóxica al serviciu de la escuela n'Asturies".

Nel trabayu discográficu tienen participao un total de 23 grupos asturianos de diferentes xéneros músicales como folk, rock, pop y música d'autor. D'esta miente aporten diferentes colores a les versiones de los cantares de coros escolares de "Xentiquina" y "Seliquín" que dirixera'l maestru Nacho Fonseca. Dalgunos d'estos temes puen sentise yá en itunes, emusic, napster, amazon, myspace, medianet, spotify y last.fm.
D'otra banda nel documental "Seliquín-Xentiquina, una ferramienta pedagóxica al serviciu de la escuela n'Asturies" nárrase'l percorríu de Nacho Fonseca dende la escuela de Porrúa na que naciera "Seliquin" hasta la de Lieres de "Xentiquina", pa ello participen nel documental, dirixíu pol realizador Pablo A. Quiroga; músicos, docentes y xente de la cultura asturiana.