Xunta Xeneral
Dende l’añu 1981, cuando Asturies algama la so autonomía, recupérase la Xunta Xeneral, institución de derechu públicu que nació pa defender los intereses del país y nel que taben representaos los diferentes conceyos. Esti órganu llevaba desaniciáu pol Reino de España tres les reformes lliberales feches nel 1835 que motivaron la creación de la Diputación Provincial de Oviedo, finando asina a una trayeutoria de cientos d’años d’actividá.
Detalle del edificiu actual de la Xunta Xeneral.
L’añu 1444, con xuntes primero n’Avilés y llueu n’Uviéu, ye cuando se considera constituyida dafechu la Xunta Xeneral. Los nobles son los que teníen presencia na mesma y nestos años destacaben nel so enfotu por condicionar les eleiciones al so favor. Asina tres munches decisiones taben los intereses de determinaes oligarquíes del país.
Ensin competencies llexislatives o xudiciales, la Xunta Xeneral centrábase en votar y xestionar los servicios monetarios y militares pidios pola Corona, asina como la toma y execución de decisiones rellatives a los intereses xenerales d’Asturies y bon gobiernu d’ésti n’obres públiques y comunicaciones, agricultura y ganadería, caza y pesca, riqueza forestal, abastecimientu d’alimentos, comerciu y industria, educación, protocolu y rellaciones institucionales, ente otros.
El 25 de mayu del 1808 la Xunta Xeneral proclamóse soberana rebelándose contra les tropes franceses de Napoleón qu’invadieren el país y demandando la restitución de Fernando VII. Convocóse baxo’l nome de Xunta Suprema, entamó la organización d’un exércitu asturianu y unvió embaxadores a Londres pa pidir el sofitu d’Inglaterra, que recibió al traviés d’uniformes y material militar.
Cola división alministrativa fecha nel 1833 por Javier de Burgos col oxetivu de centralizar el poder del Estáu, la Xunta Xeneral foi sustituyida pola Diputación Provincial de Oviedo. Nun sería hasta 150 años depués, cola llegada de la Democracia y l’Estáu de les Autonomíes, cuando ésta se recuperaría con competencies llexislatives. Anguaño, los asturianos votamos cada cuatro años a los nuesos representantes nella.
- ¿Pa qué val la Xunta Xeneral?
- ¿Por qué tuvo 150 años inactiva?
- ¿Cuála foi la so decisión más destacada?
- ¿Quién ye anguaño’l presidente de la Xunta Xeneral y el presidente d’Asturies?/li>