Viquingos n'Asturies
Protagonistes de númberoses películes y series, los viquingos son uno de los pueblos antiguos más reconocibles. Conóceslos polos sos viaxes y la so bravura, pero, como en tantes coses, nun ye realidá tolos que se cuenta.
Lo que sí ye verdá ye que yera un pueblu guerreru. Orixinariu d’Escandinavia, llanzaron ataques per mar nel norte d’Europa mientres los sieglos VIII y XI, y tuvieron presencia en numberosos llugares, ente ellos Asturies en tiempos de la monarquía asturiana.
Vquingu (estatua).
La ‘Crónica Albeldense’ rellata que la primer venida de navegantes viquingos a Asturies foi nel reináu de Ramiro I, nel añu 844, refiriéndose a ellos como normandos. Tratábase d’una de les espediciones que solíen facer pel branu.
Les cróniques ‘Rotense’ y ‘Sebastián’ cuenten el so percorríu pela mariña, l’arribada a Xixón o la derrota col exércitu asturianu, anque la primer fonte que trata estos fechos son los ‘Anales de San Bertín’. Sicasí, ésti podría nun ser el primer contautu de viquingos y asturianos, yá que una anotación d’Ibn Al-Athir cita la participación d’un guerreru coles tropes del rei Alfonso II contra los musulmanes nel 795 que podría ser viquingu.
Barcu viquingu..
Poco se sabe del por qué de la presencia de viquingos en Xixón nel 844. La ‘Crónica Rotense’ fala d’una victoria col conde Pedro al frente, pero los documentos nun dexen nidio la esistencia d’otros contautos o intercambios mercantiles ente asturianos y los escandinavos.
Sicasí, lloñe de la etiqueta que-y se dio a los viquingos esta sociedá nun sólo tuvo actos de repiña colos reinos occidentales, sinón qu’hebo contautos ente ellos y inclusive collaboración dientro’l marcu de les guerres civiles de la dómina. Esta idea bárbara vien por mor de la imaxe interesada que dieron les fontes cristianes y musulmanes de la dómina d’esti pueblu, más alantre afitaes pola lliteratura y el cine.
- ¿Quiénes son los viquingos?
- ¿Por qué son famosos?
- ¿Cuándo aportaron a Asturies?
- ¿Cuál ye’l fechu más destacáu de la so presencia equí?