Villa romana de Veranes

L’añu 29 a.C. ye cuando se fecha la llegada de los romanos a Asturies. Mientres una década, hasta’l 19 a.C., los ástures defendiéronse de los ataques de les tropes comandaes pol propiu César Augusto énte la dificicultá por conquistar los últimos territorios de la Península Ibérica –Asturies y Cantabria–, anque finalmente cayeron énte’l poder de Roma.

Cola conquista del territoriu de los ástures comenzaría la romanización del mesmu. Primero afítase un exércitu d’ocupación, pa depués proceder a una reorganización política-alminitrativa y comiencen a crease les ‘civitas’ –centros urbanos romanizaos o ciudaes nueves creaes al mou romanu– y les ‘villae’, ente elles la de Veranes, asitiada nel actual conceyu de Xixón.

Los restos arqueolóxicos de Veranes que llegaron a anguaño son de la ‘pars urbana’, esto ye, la zona residencial. Trátase d’una gran casa señorial que pertenez al modelu del Baxu Imperiu (sieglu IV d.C.), que se construyó sobre otra anterior del Altu Imperiu, tuvo hasta trés reformes y caltuvo vida hasta’l V.

El nome de la villa vien del so propietariu, Veranius, y taba asitiada próxima a l’antigua ruta romana que comunicaba estos territorios cola so capital Asturica Augusta (l’actual Estorga). Los sos restos nun llamaríen l’atención de los espertos hasta’l sieglu XX, cuando comenzaron los primeros trabayos arqueolóxicos.