Trabe inagura colección pa primeros llectores
La editorial Trabe acaba asoleyar el llibru "Cómo soi", del que ye autora Esther Prieto ya ilustrador Nanu González. L'álbum inagura la Colección "Reciella" empobinada a los primeros llectores.
Sol títulu de "Cómo soi" la editorial Trabe avérase al mundu de los llibros de prellectura, esto ye, los llibros o ludollibros que tán dirixíos a los neños y neñes qu'entovía nun rompieron a lleer anque yá conozan dalgunes lletres. El marxen d'edá por tanto d'esta colección va ser dende'l nacimientu hasta los seis años, lo que na enseñanza reglada s'identifica cola Educación Infantil.
"Cómo soi" preséntase nun tamañu bien amañosu pa los más pequeños, en tapa dura y con un testu mui cenciellu que fala de les diferentes maneres de ser que pue tener la reciella: curiosu, flaca, altu...etc. Al empar les palabres van acompañaes por unes prestoses ilustraciones.
Pese al espoxigue nos últimos años de la Lliteratura Infantil y Xuvenil n'asturianu poques son les editoriales que s'animaron a esplorar el campu de la llectura pa los más pequeños. La iniciativa de Trabe vino precedida por Llibros del Pexe y los llibros d'Ámbitu "Animalinos" y el más reciente "Animalaes".