Suburbia espubliza ‘L’árbol de la verdá’

Xurde Fernández y Marián García son los autores de ‘L’árbol de la verdá’, llibru d’aventures onde’l llector decide qué camín ha de siguir la historia. Esti exemplar trátase del númberu 2 de la coleición pa neños y neñes ‘Camín de Bree’.
 
“Esti llibru nun se llee como los otros llibros… Entama, como toos, pel entamu... Pero a partir d’ehí tu, y sólo tu, vas ser el que decidas, el qu’escueyas tolo que-yos asoceda a los protagonistes hasta que, fueyes depués, llegues a lleer la palabra FIN”, espliquen Fernández y García a los llectores nel exemplar. “‘L'árbol de la verdá’ ye un llibru qu'estimulará la creatividá y la imaxinación de los nenos”, añaden dende Suburbia Ediciones, responsables de la edición d’esta obra que va enganchar al públicu infantil pola llibertá que supón poder decidir cuál va ser el desarrollu de la historia.
 
Los neños y neñes tamién van tener l’aliciente de les ilustraciones prestoses de Gloria Caamaño qu’acompañen el cuentu. El preciu d’esta obra de 448 páxines fecha en comuña por Fernández y García ye de 12 euros.