Samartín súmase a les celebraciones del "Día de la Llingua Materna"

El conceyu de Samartín del Rei Aurelio celebra esti vienres 24 de febreru en Blimea'l Día de la Llingua Materna, nuna xornada na que se presentará'l llibru "Pa lo más piquiñino de la casa" y siguirá l'actuación del dúu "Mestura".

L'actu, que tendrá llugar na Casona del Bravial a partir de les 19.00 hores, cuntará cola presentación de la conceyala de Cultura, Gema Suárez, que va facer repasu de les acciones de promoción y normalización del asturianu que se vienen faciendo nel conceyu, entamando pola rotulación de les dependencies de los polideportivos de Blimea y L'Entregu, como yá se ficiera enantes na Casa Conceyu.
El llibru "Pa lo más piquiñino de la casa" combina testos ya ilustraciones infantiles que pretenden recoyer los tres primeros años de vida de los neños y neñes, aportando apartaos pa rexistrar el llugar y la fecha nacimientu, espublizar semeyes, sorrayar celebraciones (cumpleaños, antroxu, vacaciones..). La publicación ye una reedición de la que sacara la Rede de Normalización Llingüística nos conceyos en collaboración cola Conseyería de Cultura, y van repartise ente los recién nacíos del conceyu.