Reciella celebró la so primer actividá, centrada na celebración de la Nueche d’Ánimes, y convoca otra pal sábadu

Los neños y neñes de les families integrantes de Reciella prepararon la Nueche d’Ánimes afuracando calabaces. Ésta foi la primer actividá del coleutivu, que pa esti sábadu tien programada otra en Xixón, tres la so constitución oficial.

Un total de venti pequeños con edaes ente los 0 y 6 años participaron nesti taller, que tuvo llugar nel Conseyu de la Mocedá de Xixón el sábadu previu a la celebración de Samhaim, l’actual Nueche d’Ánimes. Cola ayuda de les sos families, los neños y neñes participantes pudieron afuracar les calabaces trayíes de casa apoyaos por un pallabreru específicu apurríu pola asociación. Pa un meyor desendolque de l’actividá, dividióse’l llocal en dos zones según les edaes.

Según espliquen dende Reciella, l’oxetivu d’esti taller “foi averar a los neños y neñes una tradición asturiana, la d’afuracar calabaces, y mete-yos dientro veles enceses, asemeyada a la conocida como Halloween y que se celebra n’Asturies y n’otros llugares d’Europa dende tiempos inmemoriales coincidiendo col Samhain, la fin del añu celta”. Los miembros de l’asociación animen al profesoráu de Llingua Asturiana a que, igual que fai'l profesoráu d'inglés col Halloween, “s'avere esta tradición tan guapa al alumnáu como daqué propio”.

Esti sábadu, tamién nel Conseyu de la Mocedá de Xixón, ta prevista una actividá nueva de Reciella. Nesta ocasión va consistir nun alcuentru nel que les families de l’asociación van axuntase “pa intercambiar esperiencies y pa que los sos neños y neñes tengan un espaciu afayadizu pa xugar, facer murales, sentir cuentos, enredar y espresase en llingua asturiana”. P’asistir a esti eventu, que va principiar a les 11.30 hores, ye necesario facer una confirmación previa.