Quince escolinos clasifiquen pa la final de la Olimpiada Escolar de Redaición Urbano Rodríguez

Esti miércoles va desenvolvese nel llar social de l’Academia de la Llingua Asturiana (ALLA) la final de la Olimpiada Escolar de Redaición Urbano Rodríguez. La institución académica entama esti concursu nel que pasaron la fase clasificatoria quince escolinos, 6 de Primaria y 9 de Secundaria y Bachilleratu.

Ésta celebróse’l 18 de payares en modalidá sincrónica a distancia. L’ALLA treslladó un tema y les condiciones de redaición nesi mesmu momentu, con una hora pa los escolinos pa desendolcalu.

Foon quinces los escoyíos como finalistes ente tolos centros participantes, estudiantes que van desplazase mañana a Uviéu pa facer la prueba final dende les 10.30 hores. Son en Primaria, Fabián Montes, Gadea Iglesias, Valeria Riestra y Adrián González Pida, del CP Martimporra (Bimenes); y Daniela González Villota y Diego Menéndez Fernández, del CP San Claudio de San Cloyo (Uviéu); y en Secundaria y Bachilleratu, Xulia Antuña, Lucía Doce, Alberto Antuña y Vidal Quidiello, del IES Santa Bárbara de La Felguera (Llangréu); Naira Suárez Sánchez y Favila Velasco, del IES Peñamayor de Nava; Nerea Menéndez Martínez y Carla Bote, del IES Pravia; y Álvaro Ordóñez, del CPEB Cabañaquinta de Cabanaquinta (Ayer).

Llueu de la final de la Olimpiada Escolar de Redaición Urbano Rodríguez, concursantes y profesoráu van participar en dos actividaes diáutiques y d’animación, una pa cada etapa educativa. Al final de les mesmes van comunicase los ganadores finales en cada categoría, que van llevar material escolar, llibros, un elementu conmemorativu y un val d’ayuda pal profesoráu, al tenor del desplazamientu y el númberu de finalistes.