Pintores asturianos
La pintura ye una de les espresiones artístiques más antigües qu’esisten. Yá en la prehistoria los nuesos antepasaos facíen representaciones humanes y animales nes paredes de les cueves, y Asturies rexistra dellos de los más importantes exemplos del mundu, como ye’l casu del Pozu’l Ramu en Ribeseya, la cueva de Candamu o La Covaciella en Cabrales.
El desarrollu del ser humanu llevó a la evolución de toles artes, ente elles la pintura y les sos téuniques. Asturies nun foi una esceición y foron numberosos los asturianos que llevaron el so mundu a un llenzu con reconocimientu dientro y fuera de les nueses llendes.
"Mazcarada n'Uviéu" d'Evaristo Valle
Los frescos, d’autores desconocíos, n’edificaciones del Prerrománicu asturianu seríen les siguientes espresiones pictóriques más vieyes que llegaron a los nuesos díes. A lo llargo de la Edá Media habría otros exemplos, pero los primeros pintores reconocíos nun llegaríen hasta’l sieglu XVII.
Ente ellos rescampla’l nome de Juan Carreño Miranda, ún de los meyores retratistes del so momentu. Nacíu n’Avilés nel 1614, trabayó l’estilu barrocu que s’estilaba nel so tiempu y llegó a ser pintor de Cámara de Carlos II, siendo famosu’l retratu del monarca o la de la so madre Mariana d’Austria, o cuadros como ‘La monstrua desnuda’, ‘Asunción de la virgen’ o los frescos na catedral de Toledo.
"Carlos II" por Carreño Miranda
Cristóbal Ferrado, Fransci Bustamante y Juan Nopomuceno foron otros pintores destacaos de los sieglos XVII y XVIII, mentes que nel XIX atopamos artistes de la talla de Dionisio Fierros, Ignacio Suárez Llanos, Ignacio León y Ventura Álvarez Sala. Nel XX dos nomes rescamplen sobre’l restu, Evaristo Valle, que nos dexó cuadros de temática asturiana de gran relevancia, como les dedicaes a les mazcaraes, o Nicanor Piñole, con importantes escenes costumistes.
Luis Menéndez Pidal y Telesforo Cuevas, que desendolcaron’l so llabor ente’l XIX y el XX, Orlando Pelayo, Joaquín Rubio Camín o Joaquín Vaquero Palacios tamién dexaron buelga col so pincel y influyeron a los autores del presente. Munches de les obres más importantes de toos estos autores citaos pueden visitase nel gran templu pictóricu asturianu: el Muséu de Belles Artes d’Asturies, asitiáu n’Uviéu.
- ¿Por qué Asturies tien tantos exemplos de pintures rupestres?
- ¿Ónde trabayó Carreño Miranda?
- ¿Qué ye’l Muséu de Belles Artes d’Asturies?
- ¿Qué cuadros conoces d’autores asturianos?
Enllaza estos estilos artísticos col sieglu nel que se desendolcaron: