Pablo Rodríguez Medina participa mañana nos talleres de llectura de Samartín

Mañana vienres 15 de payares a les 18 hores na Casa de la Xuventú de Sotrondio va celebrase la segunda sesión de los Talleres de Llectura de Samartín. El autor de ‘Tapín de Picupáu’ va tar xuntu al illustrador David Fernán.

Los asistentes van poder conocer en persona a Pablo Rodríguez Medina, autor de ‘Tapín de Picupáu’, y al so ilustrador David Fernán, tras averase al argumentu y vocabulariu del llibru na primer sesión de los talleres. Estos van responder a les entrugues de los neños y neñes y van roblar llibros como alcordanza de la so participación. El grupu de xóvenes d'ente 7 y 10 años tamién van realizar un dibuxu rellacionáu cola hestoria, con un premiu pal más orixinal.

Pablo Rodríguez Medina ye unu de los escritores asturianos más premiaos a nivel rexonal y nacional, y con 'Tapín de Picupáu' consiguió'l premiu ‘Llectures pa rapazos’ de l'Academia de la Llingua Asturiana nel añu 2005. Ente les sos obres pueden atopase tanto cuentos como poemes, obres de teatru o trabayos d'investigación, destacando títulos como “Los paraísos perdíos”, “Les vueltes, toles vueltes” o “Al aldu la memoria”. David Fernán ye un esperimentáu ilustrador que yá realizó dellos trabayos nel mundu del cómic, como ‘Xustiniano’, ‘L’home Marín’ o ‘Azincourt’.

Los talleres de llectura tán entamaos pola Oficina de Normalización Llingüística del conceyu en collaboración cola asociación cultural Bocina Nalón y l'Oficina d'Información Xuvenil. El so proposito ye averar a les nueves xeneraciones de xóvenes al mundu de la llectura con un enfoque lúdicu. L'actividá ye una de les principales novedaes de les XII Xornaes de Lliteratura Infantil y Xuvenil de Samartín del Rei Aurelio, dientro d'un programa nel que s'inclúin esposiciones y representaciones teatrales a lo llargo del mes.