Osos

21 Avientu, 2018
Pablo R. Guardado

Ún de los animales más carismáticos de la fauna asturiana ye l’osu, mamíferu carnívoru de la familia de los úrsidos que tien como carauterístiques ser de tamañu grande, forníu y tener munchu pelo. N’Asturies habita l’osu pardu (Ursus arctos arctos), en concreto l’osu pardu cantábricu, una subespecie que destaca por ser de les de menor tamaño.

A pesar d’ello, ye l’animal montés más grande de tola Península Ibérica, con un pesu que pue ser superior a los 180 quilos nel casu de los machos y que taría ente los 100 y 140 quilos nel casu de les femes, anque éstos varíen según la época del añu, yá qu’una de los sos peculiaridaes ye la hibernación. Ésta consiste nel pasu del iviernu nun estáu de dormición baxando’l so ritmu cardiacu y respiratoriu, pa lo que busquen un sitiu afayadizu.

Osu.

¿Sabíes qué…? L’osu Yogui, el personaxe de dibuxos que sirvió de promoción turística d’Asturies años atrás, nun ye un osu pardu cantábricu. Trátase d’un osu grizzly, subespecie del pardu qu’habita en Norteamérica.

Los sitios onde se guarden los osos pa hibernar llámense oseres. Esti abelllugu mayoritariamente suelen ser cueves, anque tamién pueden ser llugares escavaos na tierra, qu’escueyen mientres la seronda, cuando comen más calórico pa garrar pesu. Tamién ye’l llugar onde críen, nel mes de xineru.

Los pequeños reciben el nome d’esbardos y salen de la osera na primavera, n’abril y mayu, y vivirán xunto cola so madre mientres un añu y mediu, cuando s’independicen. Los machos nun collaboren na cría y s’aparién coles femes tamién en primavera.

Estatua de Gaspar Melchor de Xovellanos en Xixón.

¿Sabíes qué…? L’osu pardu cantábricu tuvo en seriu riesgu de desaniciu nun hai munchu tiempu. Agora la situación ye más estable, con una mayor presencia d’animales nos nuesos montes.

L’alimentación de los osos ye omnívora, esto ye, comen tanto animales como plantes, anque básicamente se resume a vexetación y frutos, ensin descartar los paneles de miel o la carroña. Son animales plantígrados –usen tola planta del pie pa caleyar– que son quien a ponese en dos pates y a esguilar pelos árboles. Otra de la sos carauterístiques ye’l so escelente olfatu.

Anguaño na Cordillera Cantábrica reside una cantidá superior a los 300 exemplares que se dividen en dos subpoblaciones, la oriental y la occidental, siendo la más numberosa la segunda. Dende la década de los 90 la población comenzó a medrar depués d’unos años de peligrosu descensu, a lo que contribuyó la concienciación de la ciudadanía y el trabayu de diferentes organizaciones como la Fundación Oso de Asturias o la Fundación Oso Pardo.