Ocle
L’ocle ye una planta talofita, del géneru Gelidium, con clorofila que vive ente l’agua de la mar o de los llagos. Ye, poro, un tipu planta marina, que suel tener un color ente collorao y verde, que ye mui habitual na mariña del Cantábricu, onde tien les sos poblaciones más importantes, anque tamién viven en tola costa Atlántica y el Mediterraneu occidental.
Ye mui habitual ver ocle nes nueses sableres. Pese a que tienen el llar nel fondu marín, les marexaes suel arrincalu y llevalu a la costa, quedando depositao nel sable. Ye nesi momentu cuando los servicios de llimpieza o les empreses encargaes de sacar provechu a esta planta, recuéyelo. Sicasí, tamién pue garrase direutamente del mar.
Gelidium corneum.
La temporada d’arrinque del ocle va de xunetu a setiembre. Buzos lláncense al mar dende’l barcu y faen un corte nestes plantes, dexando la base pa qu’ésta pueda siguir creciendo. Sicasí, esiste una polémica pola esistencia de la téunica d’arrinque, qu’afeuta más a la planta.
Recoyida d’arribazón ye como se llama a la que se fai na costa, cuando la mar dexa nel sable ocle arrincao de manera natural. Poro, ésta ye la más ecolóxica, yá que se produz pola aición de la propia mar y nun provoca daños nes poblaciones d’ocle, lo que lleva a que nun haya una llende afitada pola Alministración pa la so recoyida.
Esta planta vien emplegándose pa dellos usos dende sieglos atrás. Nel XVIII comenzó’l so emplegu tres el descubrimientu de la estraición del agar-agar, una sustancia xelatinosa que s’utiliza na industria alimentaria, cosmética o farmacéutica.
Asina, l’agar-agar úsase na industria conservera de carne y pescao, como espesante en sopes y salses, como estabilizantes en postres y productos llácteos, y na ellaboración de bébores alcohóliques como purificante, anque l’usu más tradicional ye como parte del piensu d’animales. Cremes, xampús o xabones tamién lu lleven, mentes qu’en farmacia suel emplegase en laxantes, na fabricación de píldores y na de llubricantes quirúrxicos. Nun son los únicos campos, siendo otru usu tradicional el de fertilizante.
- ¿Ónde se pue recoyer la ocla?
- ¿Qué función fai l'ocle nel so ecosistema marín?
- ¿Por qué l’Alministración pon unes llendes a la so recoyida?
- ¿Cuál foi l’usu más tradicional del agar-agar?