Novedaes editoriales pal branu

Ye tiempu de vacaciones escolares, pero tamién de pasar les hores lleendo lliteratura infantil y xuvenil. Nesti casu presentamos cuatro de les novedaes editoriales más destacaes pa esti branu: "La mio hermana ye una mofeta", "la pota encarnada", "Loles" y "Xabel escontra l'ogru".

"La mio hermana ye una mofeta" de l'autora asturiana Berta Piñán aborda con imaxinación y humor un tema tan universal como ye la llegada d'un nuevu hermanu o hermana a la familia. El testu preséntase baxo la forma d'álbum ilustráu que completa la ilustradora Francesca Asseri.
Pela so parte "La pota encarnada", de la editorial Asturtoons, recurre al mitu del oxetu máxicu pa dotar a una pota vieya de propiedaes insospechaes cuando se cocina nella. Nesti casu ye Cristina Muñiz Martín, autora de llibros como "Onde pisen poques güelgues" o "El buscador d'histories" la qu'acompaña col so testu les ilustraciones d'Enrique Carballeira. De la mesma editorial va ser tamién la tercera de les novedaes "Xabel escontra l'ogru", continuación de la historia "El principín medranosu" que ganara'l concursu de l'Academia de la Llingua Asturiana "Llectures pa rapazos" pa entrar a formar parte de la colección escolín. Nesta ocasión l'autor y dibuxante Enrique Carballeira, cuenta la historia de cómo Xabel ayudó a rescatar al so sobrín d'un malváu ogru.
Pa cabu Aurelio González Ovies retoma'l camín de la lliteratura infantil qu'antamara con histories como "Chispina" o "El poema que cayó a la mar" pa falanos de "Loles", una neña que descubre'l placer d'escribir remembrando los recuerdor que creía escaecíos. L'álbum, editáu por Pintar-Pintar, vien acompañáu poles ilustraciones de Julio Antonio Blasco.