Muries, corros, cuerries y cortinos

La téunica de construcción de piedra en seco foi bien utilizada n’Asturies nel pasáu, siendo posible ver anguaño construcciones d’esti tipu a la lo llargo de la nuesa xeografía. Un exemplu d’esta modalidá d’edificaciones son los corros, les cuerries o los cortinos, a los que vamos dedicar esta ficha didáutica.

¿Pero qué ye la construcción de piedra en seco? Trátase de xunir les piedres, cortaes o non, ensin utilizar nengún elementu pa xuniles. Asina van colocándose una enriba la otra, intentando atopar el máximu contautu ente les pieces y rellenando los güecos que pudiera haber con arena seco.

By FFT
Exemplu nos Picos d'Europa
¿Sabíes qué…? Esta téunica ye mui común non sólo n’Asturies, sinón en toda Europa.

Les muries son les contrucciones que más se pueden ver anguaño nel país baxo esti modelu de construcción. Son munches les finques que la emplegaron pa dixebrar parceles, anque nestos momentos los propietarios suelen optar por otres modalidaes más modernes.

De forma circular son los corros, les cuerries y los cortinos. Los primeros cuenten con un teyáu cónicu o troncocónicu y úsense nes brañes pa guardar el ganáu. Mentes, les cuerries empléguense pa guardar les castañes pa qu’abra l’oriciu, anque tamién pue facer referencia a los corros según la zona del país.

By FFTCastru de Cuaña
¿Sabíes qué…? Asturies participa nuna candidatura pa que la téunica de la piedra en seco sía declarada Patrimoniu Cultural Inmaterial de la Humanidá.

Los cortinos, pela so parte, destínense a guardar les colmenes d’abeyes. Nesti casu tien una función defensiva, yá qu’evita que los osos puedan averase a les mesmes y finar cola producción de miel.

¿Préstente esti tipu de construcciones? Un pequeña vuelta per zones rurales, una braña o un llugar con castañales pue valite pa ver dalguna d’elles. ¡A qué esperes pa dir cola to familia!

  • ¿Cómo funciona la construcción de piedra en seco?
  • ¿Recuerdes ónde pudisti ver una construcción fecha con esta téunica?
  • ¿Ónde son habituales?
  • ¿Pa qué s’utilicen les más carauterístiques?
Rellaciona estes pallabres cola más afayadiza:

Miel
 
Finca
 
Amagüestu
 
Braña
 
Arena
 
cortín
muria
cuerria
corrru
material pa rellenar los güecos