Meteoritos, meteoros y meteoroides

L’espaciu ye ún de los mayores misterios entovía anguaño pal home. La so inmensidá y el fechu de que namái conozamos una pequeña parte del mesmu y de los fenómenos qu’asoceden nél failu, amás d’interesante, too un retu pa la humanidá.

El trabayu científicu de munches muyeres y homes permitió avanzar abondo nel estudiu d’esti campu, sobre manera nel sieglu pasáu y no que va del actual, permitiendo viaxes al espaciu que lleváronnos inclusive a pisar la lluna o conocer con detalle’l Sistema Solar nel que s’atopa’l nuesu planeta, la Tierra. Tamién la esistencia de ciertos oxetos celestes que pueden inclusive impautar cola superficie terrestre, como los meteoroides.

Un meteoroide ye un cuerpu celeste menor que provién de los restos d’un asterioide, esto ye, cuerpos rocosos más pequeños qu’un planeta que tienen la órbita ente Xúpiter y Marte. Tamién pueden venir d’un cometa, astru formáu de piedra, metal o xelu y, inclusive, d’un satélite o planeta llonxanu que saltó al espaciu tres un choque previu.

Pa diferenciar estos cuerpos tiense tamién en cuenta’l tamañu, asina que si ye mayor de 50 metros de diámetru calificaríase como cometa o asteroide, mentes que si ye menor de 100 micrones, consideríase polvu cósmicu. Cuando los meteoroides entren en contautu cola nuesa atmósfera produz un fenómenu lluminosu, que tien el nome de meteoros.