Mercuriu
Mercuriu tratáse del planeta más pequeñu del Sistema Solar y el más cercanu a la nuesa estrella, el Sol. La so composición ye rocosa o telúrica, al igual que la Tierra y otros dos planetes, Venus y Marte, siendo un 70 por cientu elementos metálicos y un 30 por cientu silicatos.
El so nome vien pol dios romanu Mercuriu, Mercurius en llatín, el dios del comercio y mensaxeru de los dioses, fíu de Xúpiter –tamién con planeta nel Sistema Solar– y Bona Dea, que se carauterizaba pola so axilidá y velocidá. Los astrónomos antiguos bautizáronlo asina pol so comportamientu nel cielu, mui variable al tar tan cerca del sol, dalgo que desconocíen.
Mercuriu pasando delantre del Sol
La distancia de Mercuriu col Sol ye de 57.910.000 quilómetros de promediu, mentes que ta de la Tierra a 73.300.000 quilómetros de promediu. La so rotación completa ye muncho más lenta que la del nuesu llar, yá que tarda 58 díes 15 hores y 30 minutos terrestres en facelo, esto ye, ehí los díes son muncho más llargos: duren cuasi dos meses terrestres.
La superficie del planeta ye asemeyada a la de la nuesa Lluna, con numberoso cráteres frutu de los impautos de meteoritos y l’ausencia práutica d’atmósfera al ser ésta mui fina. Les sos temperatures son estremes, yá que pueden algamar los 430 graos pel día y los 180 baxo cero na nueche, lo que faen mui poco probable la esistencia de vida na so superficie.
Mercuriu
Mercuriu ye visible dende la Tierra ensin falta d’aparatos ópticos, anque ye difícil identificalu pola so cercanía pol Sol. Les primeres referencies a esti planeta correspuenden a los sumerios nel tercer mileniu enantes de la nuesa era.
La primer sonda que pudo aportar a la órbita de Mercuriu y estudiala foi nel 1975 la estauxunidense ‘Mariner 10’, qu’enantes fixera lo propio con Venus. La tamién norteamericana MESSENGER orbitara’l planeta dende’l 2008 al 2014 y les euroxaponeses BepiColombo –son dos diferentes acoplaes– viaxen anguaño hacia allá, cola perspeutiva de sobrevolalu n’ochobre del 2021 pa insertase na so órbita nel 2025.
- ¿Cuáles son les carauterístiques principales de Mercuriu?
- ¿Crees que ye posible la vida nesti planeta?
- ¿D’ónde recibe’l nome?
- ¿Por qué hai tanta diferencia de temperatura en Mercuriu ente’l día y la nueche?
Asitia estos planetes según el so orde dende’l Sol: