"Loles" algama l'accésit nos premios Anuaria

L'álbum de poesía ilustrada "Loles" d'Aurelio González Ovies y Julio Antonio Blasco, editáu n'asturianu y castellán, ta acabante d'algamar l'accésit nos premios Anuaria al Diseñu Gráficu na categoría de meyor llibru, memoria y diseñu editorial.

Los premios Anuaria van empobinaos a los trabayos, de la mena que seya, realizaos por diseñadores nel añu 2010 y 2011, cuntando col sofitu de les principales asociaciones y centros de promoción del diseñu gráficu n'España. Asina mesmo'l xuráu ta compuestu por represetantes d'estes asociaciones, certificándose a partir d'esti añu los premios como un estándar d'Escelencia en diseñu gráficu.
"Loles", espublizáu pola editorial asturiana Pintar-Pintar, pa la que ye la segunda vez que ven seleccionaos ún de los sos álbumes; ye obra del poeta asturianu Aurelio González Ovies, que tien espublizao otres obres pa la reciella como "El poema que cayó a la mar" o "Chispina".