Les competiciones de deporte base aplácense, anque sí se permiten los entrenamientos con seguridá
Les neñes y neños de 3 a 16 años, esto ye, hasta la entrada n'edá xuvenil, van poder entrenar d’un mou seguru esti cursu, anque les competiciones de deporte base s'aplacen ensin fecha. La so posible organización va quedar suxeta al análisis de la evolución de la pandemia de COVID-19, conforme a los criterios sanitarios.
La Conseyería de Cultura, Política Llingüística y Turismu espublizó ayeri nel Boletín Oficial del Principáu d’Asturies (BOPA) una resolución que llenda la práutica del deporte base n'edá escolar a un escenariu de máximu nivel de seguridá posible, cola fin de minimizar los riesgos de la COVID-19. Les midíes, de calter preventivu y organizativu, dexen entrenar y facer exerciciu nun entornu favoratible y seguru a neños, neñes y mocedá d'enseñanza Infantil, Primaria y Secundaria, anque nun podrán competir.
Asina, los colexos y institutos yá pueden ufiertar actividaes deportives siempre que se cumplan les normes conteníes na resolución nueva y na de la Conseyería d'Educación del 2 de setiembre, qu'afita los protocolos pa les estraescolares. Nel contestu de los Xuegos Deportivos, la gran competición del deporte base asturianu qu'entama'l Gobiernu, los neños, neñes y mocedá que s'inscriba va tomar parte n'entrenamientos entamaos y dirixíos dende les escueles deportives de los centros educativos, de los conceyos y de los clubes, de manera acomuñada y preferentemente por unidá o centru escolar.
Pela so parte, les federaciones deportives, al tener de referencia'l mesmu grupu poblacional, van tar suxetes a les mesmes midíes organizatives y de prevención, y tendrán de planiar la so actividá de forma coordinada cola Direición Xeneral de Deporte, dependiente de la Conseyería de Cultura, Política Llingüística y Turismu. Los entrenamientos y les práutiques de calter non competitivu, tantu nel ámbitu de los Xuegos Deportivos como nel federativu, tendrán de realizase ensin públicu y acordies colos protocolos aprobaos pa cada modalidá, con independencia de si son deportes de mayor, menor o nulu contactu físicu.
Los xuveniles sí van competir
Nesta resolución queden fuera los menores n'edá xuvenil, que sí van poder competir nos sos deportes.