L'Antroxu y la lluna
El próximu 1 de marzu ye’l Martes d’Antroxu. L’añu pasáu’l Martes d’Antroxu cayó’l 16 de febreru, y hai dos años el 25 de febreru. Como pues ver, l’Antroxu nun cai siempre na mesma fecha, sinón que cambia d’añu en añu. L’oxetivu d’esti artículu ye esplicar el porqué d’estos cambios.
L’Antroxu ta relacionáu cola Selmana Santa
L’Antroxu nun ye una fiesta relixosa, pero tien muncho que ver cola Selmana Santa. Antiguamente había que guardar un periodu de moderación y astinencia antes de la Pascua; esti periodu, llamáu Cuaresma, duraba cuarenta díes. L’Antroxu yera la despedida de los placeres mundanos; la xente comía, bebía, disfrazábase y baillaba enantes d’entrar en Cuaresma. Güei l’Antroxu y la Cuaresma siguen esistiendo, pero les costumes yá nun son como antes. En munchos sitios l’Antroxu celébrase la fin de selmana anterior a la Cuaresma; el sábadu hai un desfile onde participa la xente disfrazao, y’l martes faise l’Entierru la Sardina, que ye una parodia na que s’entierra una sardina que representa lo malo qu’hai que borrar del pasáu. N’Asturies celébrase tamién un Antroxu tradicional nel solsticiu d’iviernu.
Los díes qu’hai que tener en cuenta pa la determinación del martes d’Antroxu son los siguientes:
Miércoles de Ceniza. Ye’l día siguiente al martes d’Antroxu. Ye’l primer día de Cuaresma.
Cuaresma. Ye’l períodu comprendíu ente’l Miércoles de Ceniza y la tarde del Xueves Santu. La Cuaresma son los cuarenta díes que van dende’l miércoles de Ceniza hasta’l sábadu anterior a Pascua sin contar los domingos.
Equinocciu de primavera. L’equinocciu de primavera ye un momentu del añu nel que’l día y la nueche duren lo mesmo. Ye tamién el principiu de la primavera. Astronómicamente, la fecha del equinocciu nun ye siempre la mesma, pudiendo variar d’un añu a otru ente’l 19 y’l 21 de marzu nel hemisferio norte; ello ye debío a complexidaes del movimientu de la Tierra. Dende l’añu 525 la Ilesia toma’l 21 de marzu como l’equinocciu de primavera, independientemente de cuándo asoceda l’equinocciu astronómicu.
Domingu de Pascua. Ye’l día nel que los católicos conmemoren la resurrección de Cristu depués de la crucifixón. Ye’l primer domingu depués de la primera lluna llena que cai en o depués del equinocciu de primavera. Estableciólo así la Ilesia Católica nel añu 325. Nel añu 1582 estableció tamién que nel casu de que’l domingu de Pascua cayere en lluna llena, pasaríase al dimingu siguiente pa nun coincidir cola Pascua xudía. El xueves y vienres anteriores al domingu de Pascua son Xueves Santu y Vienres Santu.
Domingu de Ramos. Ye’l domingu anterior al Domingu de Pascua. Los católicos celebren la entrada de Cristu en Xerusalén.
Lluna llena. Pal cálculu de la lluna llena la Ilesia emplega unes tables ellaboraes a partir del añu 1582. La lluna llena eclesiástica y l’astronómica a veces nun coinciden.
Na figura 1 pues ver toos estos díes marcaos sobre los meses de marzu y abril del añu presente 2022.
Figura 1. Díes que tienen que ver col martes d’Antroxu (exemplu pal añu 2022).
Cómo se determina la fecha del Martes d’Antroxu
Nes figures que vienen a continuación ta representáu’l 21 de marzu (equinocciu de primavera eclesiásticu) por un rectángulu naranxa. Les llunes llenes tan representaes por círculos grises con una L, L1 o L2 dientro. Los domingos tan representaos por cuadraos coloraos con una D, D1 o D2 dientro. El Martes d’Antroxu ta representáu por un cuadráu verde con una A dientro, y’l Miércoles de Ceniza con un cuadráu gris con una C dientro. El tiempu avanza pa la derecha de les llinees horizontales.
Pa determinar la fecha del Martes d’Antroxu pues facer lo siguiente (sigue les fleches azules na figura 2-1):
- Busques nel calendariu’l 21 de marzu (equinocciu de primavera eclesiásticu).
- Busques la primera lluna llena depués del 21 de marzu.
- Busques el primer domingu depués de la lluna llena: esi ye’l Domingu de Pascua.
- Cuentes cuarenta díes p’atrás dende’l Domingu de Pascua (sin contar los domingos) y acabarás nel Miércoles de Ceniza o primer día de Cuaresma.
- El día anterior al Miércoles de Ceniza ye’l Martes d’Antroxu.
Otru métodu que se usa muncho ye ésti (sigue les fleches azules na figura 2-2):
- Busques nel calendariu’l 21 de marzu (equinocciu de primavera eclesásticu).
- Busqus la primera lluna llena depués del 21 de marzu.
- Busques el primer domingu depués de la lluna llena: esi ye’l domingu de Pascua.
- Llocalices el Domingu de Ramos, que ye l’anterior al de Pascua.
- Cuentes cuarenta díes p’atrás dende’l domingu de Ramos y acabarás nel martes d’Antroxu.
Figura 2. 1) Llocalizar el martes d’Antroxu dende Pascua. 2) Llocalizar al martes d’Antroxu dende Ramos.
El fechu de que’l Martes d’Antroxu y’l Domingu de Ramos tean separtaos por cuarenta díes nun tien nengún fundamentu astronómicu nin relixosu, pero ye una coincidencia prestosa que fai qu’esti métodu tenga muncha aceptación.
Casos particulares
Vamos ver de siguío dalgunos casos particulares que se puen presentar a la hora de calcular la fecha del Domingu de Pascua, y polo tanto la fecha del Martes d’Antroxu.
La lluna llena cai’l 21 de marzu (figura 3-1). Siguiendo’l procedimientu esplicáu enantes, el Domingu de Pascua ye’l primeru que s’alcuentre depués de la lluna llena.
La primera lluna llena depués del 21 de marzu cai de domingu (figura3-2). Nesti casu, al coincidir la lluna llena en domingu, la Pascua pasa pal domingu siguiente pa que nun coincida cola Pascua xudía. Un exemplu d’esti casu pasó l’añu pasáu, 2021, nel que la primera lluna llena de primavera foi’l 28 de marzu que yera domingu, polo que la Pascua pasóse al domingu siguiente, 4 d’abril.
En cualquiera de los dos casos pa llegar al Martes d’Antroxu hai que cuntar cuarenta díes p’atrás como se dixo enantes.
L’añu ye bisiestu. Nesti casu febreru tien un día más. Si la Cuaresma inclúi esi día entós tendrá 41 díes en vez de 40.
Figura 3. 1) La lluna llena cai’l 21 de marzu. 2) El domingu de Pascua coincide cola lluna llena.
Feches estremes
Tamos viendo que’l Martes d’Antroxu cai nun día distinta cada añu, pero ¿cuándo cai lo más pronto posible? ¿Y lo más tarde posible? Vamos velo de siguío.
El día más tempraneru (figura 4-1). El día más tempraneru pal domingu de Pascua ye’l día 22 de marzu. Esti casu dase cuando la lluna llena cai’l sábadu 21 de marzu. El martes d’Antroxu cayería entós el 3 de febreru.
El día más tardíu (figura 4-2). El día más tardíu pal Domingu de Pascua ye’l 18 d’abril, si nun ye domingu, porque si lo ye pasaría al domingu siguiente, que ye’l 25 d’abril. Nesti últimu casu, el Martes d’Antroxu cayería’l 9 de marzu.
Figura 4. 1) El día más tempranu pal Domingu de Pascua. 2) El día más tardíu pal Domingu de Pascua.
Como pues ver, determinar la fecha del Antroxu nun ye complicao si sabes de mano qué día cai la primera lluna llena de primavera. De toes maneres, si quies ser prácticu y nun t’apetez andar faciendo cálculos y cuentes, n’Internet pues alcontrar con facilidá páxines web con calculadores que faciliten les feches del Domingu del Pascua de cualquier añu pasáu y futuru. En cualquier casu, convién que nun te pille l’Antroxu sin tener el disfraz preparáu.