L’Anguleru yá ta llegando a Asturies

El sábadu celebramos Nuechebona, el día nel que L’Anguleru llega a Asturies nel so barcu dende’l mar de los Sargazos, onde cuira tol añu de les anguiles y de les angules. La comunicación última con la embarcación avisa de que verá’l puertu de L’Arena a les 18 hores, onde va saludar a toles neños y neños que lu reciban.

El de mañana ye ún de los momentos más esperaos del añu nes cases asturianes. Yá tán preparaos los gorros de llana pa poner baxo l’árbol de Navidá y esperar los regalos que dexa L’Anguleru, que merca coles perres que gana vendiendo l’angula que pesca nesta xornada.

El ríu Nalón ye la so entrada habitual depués d’un llargu viaxe. En L’Arena l’Asociación Garabuxada prepara’l recibimientu d’esti personaxe navidiegu, con cabalgata pel pueblu incluyida, pa depués dexar trabayar a L’Anguleru nuna nueche tamién bien llarga pal nuesu collaciu.