La penicilina

21 Avientu, 2018
Pablo R. Guardado

Dalgunos de los grandes avances de la humanidá nacieron frutu de la casulidá. Ún d’ellos ye la invención de la penicilina, sustancia antibiótica que se saca del fungu Penicillium notatum y que salvó la vida de millones de persones afeutaes pola tuberculosis, la escarlatina, la neumonía bacteriana o la fiebre reumática, ente otres enfermedaes.

El so descubridor foi l’escocés Alexander Fleming. Enantes muches cultures conocieran les propiedaes bactericides de los fongos, y afondando nesti campu’l científicu diera cola penicilina nel 1928, anque’l so potencial verdaderu nun se conocería hasta años depués cuando l’australianu Howard Walter Florey, compañeru na universidá del alumnu de Fleming Cecil George Paine, investigó esta sustancia.

Calibuon at English Wikibooks [Public domain], via Wikimedia Commons

Alexander Fleming.

¿Sabíes qué…? La primer persona tratada con penicilina morrió, pero los efeutos positivos que provocó n'él llevaron a siguir trabayando na so aplicación en medicina.

Como bien dicíamos enantes, la penicilina descubrióse de manera casual. En setiembre del 1928, cuando Fleming volvió depués d’unes vacaciones al llaboratoriu del Hospital St. Mary de Londres onde estudiaba cultivos bacterianos, observó que munches de les plaques taben contaminaes y colocóles nuna bandexa de lysol pa llimpiales.

Una de les plaques qu’entovía nun llavara llamó l’antención de Fleming y d’un compañeru, Merlin Pryce. Alredor del fongu contaminante creóse un espaciu onde nun había bacteríes, lo que lu llevó a aisllar y cultivar el fongu pa continuar cola inventigación al so alrededor al ver les sos propiedaes y les posibilidaes que surdíen.

Science Museum London / Science and Society Picture Library [CC BY-SA 2.0 (https://creativecommons.org/licenses/by-sa/2.0)], via Wikimedia Commons

Amuesa de penicilina presentáu por Alexander Fleming a Douglas Macleod, 1935.

¿Sabíes qué…? El primer monumentu dedicáu a Fleming en tol mundu construyóse en Xixón. Ta nel parque Isabel la Católica y llevantóse nel 1955.

La investigación sobre la penicilina por parte de Fleming allargóse hasta’l 1934, cuando se dedicó a otros estudios. Nun sería hasta’l 1939 cuando Florey xunto a Ernst Chain y al bioquímicu Norman Hetley consiguieron estabilizar y purificar la penicilina, comenzando les pruebes con ratones.

Nel 1941 llegaría la primer prueba con un home, darréu consiguiríase producir el productu en masa y nel 1945 el Premiu Nobel de Medicina sería compartíu por Fleming, Florey y Chain “pol descubrimientu de la penicilina y el so efeutu curativu en delles enfermedaes infeicioses”. El mundu cambiaría dende entós.