La Lliteratura Infantil y Xuvenil marcha de folixa esti vienres

Esti vienres 1 d'abril abrirá les sos puertes la llibrería especializada en Lliteratura Infantil y Xuvenil que la editorial Pintar-Pintar cuenta tener n'Uviéu. Na inaguración, qu'en palabres de la responsable editorial Ángela Sánchez "quier poner el focu sobre la LLIX pa vindicar el so pesu específicu", van tar presentes un bon garrapiellu d'escritores ya ilustradores.

Nos entamos del añu 2011 la editorial asturiana Pintar-Pintar treslladaba les sos oficines a la Plaza Concha Heres d'Uviéu. Esti treslláu tenía l'envís de facer del proyectu editorial daqué más ambicioso, cola creación d'un espaciu onde'l llabor d'edición pudiera vese complementáu cola llibrería y la realización de talleres y presentaciones.
La inaguración de los nuevos locales, que tendrá llugar esti vienres a partir de les 19:30 hores, quier atraer l'atención de medios de comunicación, instituciones y llectores hacia los llibros pa la reciella y, mui especialmente, hacia aquellos que se faen n'Asturies y n'asturianu. Pa ello asistirán al actu autores como Aurelio González Ovies, Vicente García Oliva, Ester García, Marisa López Diz, Maria Luz Pontón o Miguel Rojo; asina como ilustradores como Francisco Pimiango, María Díaz Perera, Tina García o Ánxelu González.