La IV Sestaferia del Profesoráu d'asturianu va celebrase en Xixón
Por cuartu añu consecutivu la Conseyería d'Educación en collaboración col Centru de Profesoráu y Recursos de Xixón convoquen la Sestaferia del Profesoráu d'asturianu, nesta ocasión centrada nel desarrollu de les competencies básiques.
La cuarta edición de la Sestaferia del Profesoráu d'asturianu va tener llugar en Xixón el próximu vienres 1 de xunu, n'horariu de mañana y tarde, teniendo nesti casu como tema central el desarrollu de les competencies básiques nel ámbitu de l'asignatura de Llingua Asturiana.
El programa d'actividaes de la xornada arrancará a les 9.00 hores cola entrega de credenciales y la conferencia que se presenta sol títulu Contribución de la llingua asturiana al desarrollu de les competencies básiques, pronunciada por Santiago Fano Méndez. Darréu d'ello MªTeresa González Iglesias falará de La llingua asturiana na escuela: un futuru más competente.
Les xornaes de la mañana y la tarde completaránse con dellos talleres, de los que los asistentes habrán d'escoyer dos, y rematará cola actuación musical d'Anabel Santiago y Xulio Arbesú.
El plazu p'apuntase acaba'l próximu 28 de mayu.
