La Ḥoguera
Una de les tradiciones más sorprendentes pal visitante cuando presencia les fiestes tradicionales asturianes ye la ḥoguera, con un especial puxu anguaño nel oriente d’Asturies. Trátase d’un ritual consistente en cortar un árbol y llantalu depués nel prau de la folixa.
La ḥoguera –arbolón o mayu n’otres zones del país– ta venceyada a ritos de primavera y de fertilidá precristianos, pudiendo tar l’orixe del so nome nes tradiciones de San Xuan. Col pasu los años, y tres la llegada del cristianismu, que siempre buscó adaptar les costumes paganes, pasó a celebrase al rodiu del santu, patrón o fiesta llocal.
Llevando la Ḥoguera (Fiestes del Santo Cristo del Amparo, Nueva-Llanes).
El día enantes de la fiesta, los mozos corten l’árbol, quiten les rames y llévenlu al llombu hasta onde se planta. Ésti ha de ser derechu, d’ente 30 y 40 metros d’altor, y se suel escoyer una llamera, un álamu, un chopu o un omeru.
El sitiu pa llántalu y xeneralmente nel prau de la fiesta o onde la capiella, que munches vegaes suel coincidir. El papel de les moces nesti ritual ye acompañar el treslláu de la ḥoguera con coples y panderetes, pa lo que se visten na mayor parte de les celebraciones col traxe tradicional.
Los temes que cantes les moces son específicos pa esta xornada. Asina atopamos entes les más populares aquel que diz “arriba mozos, arriba / arriba con esa ḥoguera / si nun pueden los solteros / vengan los casaos, vengan”.
n dalgunos sitios la folixa fina tres el llantáu de la ḥoguera con una danza prima n’honor a la festividá. N’otros, un mozu esguila pel troncu pa retirar les cuerdes emplegaes pa xubila mientres glaya vives al santu o’l patrón.
- ¿Por qué se llama ḥoguera a esti ritual?
- ¿Cómo se pronuncia la grafía ḥ y por qué s’emplega pal oriente?
- ¿De cuándo vien esta tradición?
- ¿Qué papel xueguen los homes y les muyeres y por qué?