La familia Guardado va llevar el testigu na carrera 'Entaína'

Dorsales IV Entaína

Celébrase esti domingu nel Día de la Reciella.

La familia Guardado toma'l relevu de la Trancho y va encargase de llevar el testigu nel IV 'Entaína'. Tolos años simbólizase d'esta manera la tresmisión del asturianu d'unes xeneraciones a otres dientro de la misma familia como una garantía de futuru pal idioma, y nesta ocasión Chema va comenzar con él pa depués da-ylo a David y ésti a los sos fíos Xana y Mael.

'Entaína' va comenzar a les 11.30 hores nel Muséu del Pueblu d'Asturies y media hora enantes van abrise les inscripciones, anque yá ye posible apuntase calcando equí. La participación tien un costu de 3 euros, pa los adultos, y de 2 pa los menores, y inclúi un avituallamientu y delles sorpreses.

La carrera tien un formatu de marcha d'un quilómetru, aptu pa toles edaes, y abrirá les actividaes del VII Día de la Reciella. Hasta les 19.30 hores van entamase nel llugar talleres, conciertos y exhibiciones deportives de baldre.