La editorial Impronta llanza coleiciones nueves de llibros pa neños y neñes n'asturianu
La editorial xixonesa Impronta llanza les sos series nueves de llibros infantiles escritos n'asturianu. Los dos primeros volumes yá s'atopen nes llibreríes.
Los títulos qu'inauguren esta ufierta lliteraria nueva son ‘El llibru de les vocales’ y ‘Enantes de nacer yo…’. El primeru ye un llibru del poeta Francisco Álvarez Velasco que, coles vocales como protagonistes, xuega col llinguaxe moviéndose ente la poesía, les cosadielles y los cantares de siempre. Contién amás un homenaxe a ‘Voyelles’ d'Arthur Rimbaud y preséntase como'l primer títulu de la serie ‘Fierabrás’, que llega en formatu álbum y coles ilustraciones de Graffiti y Marina Lobo, compaxinando un estilu vintage con propuestes novedoses que se carautericen pol amor al llinguaxe, los cantares y los xuegos de pallabres.
‘Enantes de nacer yo…’, con testu d'Irene Riera y ilustraciones de Lara González Lobo, amuesa la molición d'una neña que s'entruga cómo yera'l mundu primero qu'ella naciera. Trátase del primer númberu de la serie ‘Bonos principios’, na que la neña protagonista cavila sobre cualquier asuntu col so puntu de vista particular, siempre gayoleru y con bon humor.