L’entamu de talleres de llectura, novedá nes Xornaes de Lliteratura Infantil y Xuvenil de Samartín
El llunes van principiar les XII Xornaes de Lliteratura Infantil y Xuvenil de Samartín, que dende’l 2011 son n’asturianu dafechu. La novedá d’esti añu ye la incorporación de dos talleres de llectura impartíos por Pablo Rodríguez Medina y Chechu García.
Nestes dos iniciatives, entamaes dende la Oficina de Normalización Llingüística de Samartín del Rei Aurelio en collaboración cola asociación Bocina Nalón y la Oficina d’Información Xuvenil de Samartín del Rei Aurelio, van facese xuegos y actividaes rellacionaes colos llibros ‘Tapín de Picupáu’, de Pablo Rodríguez Medina, y ‘Marta y el peludín de Carrandi’, de Chechu García. El primeru ta destináu a neños y neñes de 7 a 10 años y va celebrase en trés sesiones: los vienres 8 y 15 de payares na Casa de la Xuventú de Sotrondio, y el vienres 29 na Casona del Bravial de Blimea. Mientres, el taller de García son afayadizos pa rapazinos y rapacines de 4 a 6 años, que van poder disfrutalos los vienres 22 y 29 na Casona del Bravia. La inscripción nestes actividaes, que van principiar a les 18 hores, ye de baldre, siendo’l día caberu p’apuntase’l vienres. La direición pa informase y acutar plaza ye bocina@bocina.org, dalgo que tamién se pue facer al traviés del teléfonu 984.11.22.39.
La esposición ‘Hai un ringlera trazada’ sobre los escritores del conceyu va servir p’abrir estes xornaes el llunes. Ésta va tar situada hasta’l día 15 na Casa de la Xuventú de Sotrondio, n’horariu de 10 a 13 hores y de 17 a 21 hores de llunes a vienres, pa depués pasar a Blimea (de 9 a 13 hores, de llunes a vienres), onde se va caltener hasta’l día 29. Per otru llau, la muestra sobre’l llibru ‘Mieu’ del escritor Milio’l del Nido y l’ilustrador Alberto Sastre, que l’añu pasáu tuvo en Blimea, va poder vese nesta ocasión en L’Entregu, nel Colexu Públicu El Bosquín, del llunes al vienres próximu.
Complétense les actividaes cola representación d’obres de teatru nel Teatru Municipal de L’Entregu pa los escolinos del conceyu, estaya única de les xornaes qu’incorpora’l castellanu. Carlos Alba ‘Cellero’ va protagonizar el martes ‘Sol, luna, arriba y abajo’ en dos funciones, a les 10.30 y a les 11.30 hores, pa neños de 0 a 3 años. Al día siguiente, a les 11.30 hores, va ser el turnu de los escolinos de primero y segundo de Primaria, con ‘Un gallinero en la azotea’, d’El Callejón del Gato, pa depués continuar el martes 19, tamién a les 11.30 hores, con ‘Cuatro hojas y la máquina fantástica’, de Producciones Quiquilimón, destinada a alumnos de terceru y cuartu de primaria. Éstos tamién van poder disfrutar el vienres 22 de ‘Por las nubes’, de La Sonrisa del Lagarto, a les 11.30 hores. Va zarrar esta estaya Nun Tris Teatru’l martes 26 (11.30 hores) con ‘El pelegrín valiente’, una adaptación del cuentu d’Antón García afayadiza pa los más mayores de Primaria, los de quintu y sestu.
P’animar a la llectura
Nel actu de presentación de les xornaes, que se celebró ayeri, Gema Suárez, conceyala de Cultura, Educación, Igualdá y Deportes, destacó qu’esta iniciativa que cumple doce ediciones “abarca les artes escéniques y les lletres cola finalidá d’animar a la llectura a la infancia y la mocedá. Naguamos por educar dende l’entretenimientu con una programación de calidá, acercando a la población escolar les últimes producciones teatrales y lliteraries”, al mesmu tiempu que pretende “sorrayar les creaciones de los autores del conceyu”.
Na semeya, Carlos Álvarez, de l'Asociación Bocina; Suárez; y Hugo Cortina, responsable de la Oficina de Normalización Llingüística de Samartín del Rei Aurelio.
