Ígor Medio
Músicu y dibuxante, Ígor Medio dexó una gran buelga creativa magar que dexó esti mundu a la temprana edá de 34 años por un fatídicu accidente de tráficu nel 2006 de la que diba a tocar con Felpeyu a Catalunya nel que tamién perdió la vida’l so compañeru Carlos Redondo. Fundador d’esti grupu históricu, entovía activu, y ‘padre’ de ‘La Familia Castañón’, emocionónos col so bouzouki y sacónos risotaes col so llápiz.
Nacíu en Xixón nel añu 1972, creció nel barriu obreru d’El Natahoyo. Dende mui pequeñu entamó a dibuxar y siempro tuvo esmolición pola cuestión llingüística: yá más mozu, pidió conseyu al escritor Vicente García Oliva, collaciu de los sos padres, pa que-y asesora na correición del asturianu pa presentar un cómic, de nome ‘Confrontación’, a un concursu de la revista ‘El Llapiceru’, que ganó.
![Ígor Medio y la familia Castañón](https://asturies.com/sites/default/files/igor_medio_la_familia_castanon.jpg)
Ígor Medio y la familia Castañón.
Nun aparó nunca de dibuxar, tamién na so etapa en Salamanca, onde acudió a estudiar Belles Artes. Ehí estudió con Ruma Barbero, col que coincidió una época na Llaboral y col qu’afondó tamién nel tema musical al compartir l’afición pol folk.
Xuntos, nel 1990, viaxaron enantes d’entamar el cursu universitaria al Festival Interceltique de Lorient, en Breizh –nome en bretón pal territoriu conocíu como Bretaña, en Francia–, onde conocieron muncha xente y tendencies musicales. Poco depués nacería Felpeyu, grupu históricu del folk asturianu que trabaya la reellaboración de la música tradicional del país.
![Conciertu homenaxe a Ígor Medio](https://asturies.com/sites/default/files/el_conciertu_digor_medio.jpg)
Conciertu homenaxe a Ígor Medio na 43 Selmana de les Lletes Asturianes.
Nestos viaxes acompañábase de la so llibreta, que nunca dexaba de dibuxar. Dos facetes, la música y el cómic, que desendolcó con gran relevancia hasta convertilu nun de les persones más destacaes nestos campos n’Asturies.
El discu ‘Dual’, proyeutu qu’entamó con Lisardo Prieto estrenando lo que se fixo llamar folk de cámara, foi otra de les sos iniciatives musicales, campu nel que tamién fixo llabores de producción. ‘La Familia Castañón’, viñeta humorística que s’espublizaba en branu nel diariu ‘La Nueva España’ que contaba les prestoses histories d’una familia xixonesa, convirtióse na so gran creación nel cómic, anque non la so producción única, con numberosos trabayos nos que, igual que na música, el respetu y la defensa de la cultura y la llingua asturiana rescamplaba.
- ¿En qué aspeutos destacó Ígor Medio?
- ¿Qué instrumentu tocaba?
- ¿Qué carauterizaben a los sos cómics?
- ¿Sabríes dicir cantares de Felpeyu?